Lupos ti Uleg iti Pitaka

Inik-ikutak iti agrurutap a dekada
ti lupos ti uleg, karasaen sa ketdi
a nagtaraok saan nga iti parbangon
no di ket kadagiti prase iti panid
sa iti panid iti kapitolo
sa iti kapitolo iti episodo
ti sarsarita idi ugma nga ita
iti daytoy a kanito ti panangal-alaw
iti panunot a makaad-adayo
agballasiw kadagiti danum alipugpog
agsalpot kadagiti mata dagiti layus bagyo alikuno
ket iti umok dagiti uleg nga agukop
kas iti gita dagiti sirmata
kas iti ur-urayen a naimbag a gasat
panangiyawid, kas pagarigan iti superlotto
iti California wenno iti Marikina a taeng
dagiti masangal a salaysay iti panagkalkallautang
ti palad kadagiti panawen a bulbuloden
wenno saan a kukua ngem tagtagikukuaen
ta kasta ngarud dagiti exilo a ranggas
a kabulig ti panagbirbirok iti bendision
dagiti agkamata nga aldaw
dagiti agmandi a sardam
dagiti agpuerong a lam-ek nga umukuok
kadagiti umuna a linabag ti surat
tay nagabay a sungbat iti saludsod
dagiti annak a no agkita ket iti laeng telepono
kadagiti istatiko a timek dagiti mabayadan a kanito
a no agkibaltangka ket birkogen dagiti numero
nga ingkabisadon ti tamudo.

Inaldaw a bidingbidingek ti lupos ti uleg
iti pitaka. Inaldaw nga agkidkiddawak
iti teknikolor a biag
marismarisan kas iti singin a bullalayaw
iti Waikele nga agimbag-a-bigat kenka
kalpasan ti managparparbangon nga arimukamok
wenno ti agtutuon a bullalayaw iti Manoa
a mangipalpalagip iti anag ti anges
ti kararag ti salun-at ti pia ti karadkad
ti araraw kadagiti anito espiritu didios
iti nakaparsuaan wenno iti ing-ingunguten a pisos
sukat ti doliar a yarikap iti bulsa dagiti panggep
nga agur-uray iti pannubbot.


Arikapen ti lupos ti uleg
iti pitaka. Lagipen ti pakabuklan
ti agbannawag a pattapatta
kadagiti maidaton a sakripisio
iti nagan ti kapuyo dagiti mata.


A Solver Agcaoili
UH Manoa/Mar 4, 2007