Iti ballasiw-taaw, agsukaykami met
iti sabali a daga.
Pangur-urayanmi iti bisibis
ti sanggamaysa ken managbabain
nga arimukamok
managtuktukiad a lumaem kadagiti taeng
a sangalenmi manipud iti pangngadua
iti buteng iti tured-pakinakem
wenno tured-sipit uray
no adda danum ti tumeng
wenno agkarindanum ti agkalamri a bibig
nga agar-araraw iti asul a langit
iti bumerde a baybay a pallailang
dagiti dumarop a rugso.
Ita a bigat, alaek ti gabion
ket sukitek ti sudak iti nakemko.
Sukayek dagiti kari
kadagiti sinilong iti appupo
ket sibugak sibugak sibugak
iti inanama, tay panagkalimduosan
iti ling-et a nangsaranget iti apo init
iti katengngaan ti bara
iti ungto dagiti raya
a sumarot iti danum
sa iti lansad nga agindeg
iti unday dagiti palimed
dagiti manglanglangan a bituen
iti sardam. Adayo ta adayo
ti distansia ti ragsak ken limdo:
iti giwang dagitoy ti panagruting
ti bunubon a maitukit
maganaganan iti saplit
bugkaw bugtak iti labes ti balikas
imbag laeng a pangkigtot
iti daga a naangrag.
A solver Agcaoili
UH Manoa/Mar 3-07
4 comments:
wen, sukayen, ka ariel... kunak la no daydiay nakintal a daga ti gukayab a pasmok ti kaimnasan a kidem, hehehe!
nagsayaaten tay kunam a kaimnasan a kidem?
ignoranteak, ka jim! ania ngata daydiay? explain, explain, hehe!
ania dagitan a sabali a daga kada kidem? isurodak mammet mamanongko ida, aya?
rva:
you are too young! menor de edad, kunada. dimo pagbasolen ni ka jim, ala.
Post a Comment