Agas ti Bannog

(Ken Nasudi Francine, tapno matagibenna ti lagip ti amana a nagtalawataw.)

Agas ti bannog ti nasarangsang a katawam.
Mais nga agbusi wenno bagas, daytay naani
Iti managpabus-oy a rikna ti turod
Ken immula ti anos dagiti amin
Nga ammam ken innam ken kakabsatmo iti ili.
Isuda dagiti makaammo iti apges ti boksit
Ken ti panaas ti panunot a malislisayan.
Makapasaraaw met ngamin ti linteg
No iti komedor ket manglangan ti labay.
Namak pay iti sarusar wenno iti agpiangpiang
A pagbagasan a ti lansadna ket buttaw.
Uray man ket ikiraodmo nga ikiraod ti ibit
No ket ta iti altar dagiti kailian
Ket nagdudupudot kadagiti dios nga arsab.
Nakitam a pakanenda pay iti nalabbasit a mansanas
Iti bigat ket aldaw? Wenno ti naranghita nga anak-ti-diables
Ti panagkusipet dagiti matam? Wenno ti dummon
Ti baak a ti suprakna ket kayatmon ti matay?
Wenno 'tay karissabong a kalamansi
Wenn ania latta ditan a magammatan, basta
Nagtimbukel a kaarngi ti asi ti langit:
Pirak nga agbirbirakat wenno pirak pay
Iti sakaanan ti mannakabalin a nakamassayag.

Iti ungto ti telepono ket makitaka:
Ti ubing a pinanawan tapno kadagiti sinurat
Ket kadarrato a kasao, kaginnarakgak, kasinnubli
Kadagiti amin a pagkukurusan dagiti isem
Wenno daytay panagkikkiki iti bagi no kasta
A dumteng ti sasalikaden a leddaang.

Dikan mangipatulod iti munmunieka, kunam,
Saanen a Barbie wenno Bratz nga addaan iti olandes
A buok wenno nakartib a kiday.
Adda baratilio dagiti ay-ayam iti aldaw
Dagiti nailian a bannuar, kunam,
Ket iti yiikkis ni Bonifacio iti wayawaya,
Gumatangka iti makaigapu
Iti ubing pay a pakapnekam.

Sandi ti kinaawan a yan-anaymo lattan a liwliwam.
Napipia latta pay ngem ti palad a manglanglangan.


A Solver Agcaoili
Hon, HI/ 12-08-07