(Ket nagawid ni Benazir Bhutto. Ket babaen iti tallo a kalbit iti paltog, natay. Dec 26, 2007)
Saan ngamin nga iti hustisia ti ili
ti nakaibalabalaan ti panagsubli
kadagiti an-anek-ek. Anansata
kaskasdi met ti panagtabugga
dagiti awanan iti man ilik
wenno iti Riwaldi a nakapasagam.
Kasta kami met: agiyatangkami
a naynay iti biag ken anges
ken adu a pammagbaga
tapno koma agsublitayo
iti innarayat wenno pinnadigo
ket agsalatayo kadagiti kallaysa
saan nga agdung-aw iti pannakaipatli
manen ken manen ti demokrasia.
Diak ammo a saritaen dagitoy a rikna
itatta. Iti kinaagtutubo iti kabisera
ti ilik ket ti lengguahe met ti rali
ti panaggikkis dagiti kalsada
ti panangisalda iti turog tapno kadenna
ti aspaltado nga idda
kaatag dagiti aminen a buteng
iti rifle man wenno iti bugtak
ti diktador wenno ti heneral
isuda makaam-ammo ti pusipos
ti madusdusa nga alipuspos.
Kasano a saritaek ti panagkakaarngi
dagiti rugi dagitoy a lamentasion
iti naunday nga agpatnag?
Di met ta uray dagiti monghe ti Tibet
ket labusanda iti kararag?
Di met ta uray ti rebolusion ti safron
ket ti panagpukaw dagiti kumakararag
isuda a kaing-ingas dagiti kappia
nga agindeg kadagiti nainanaan a lasag?
Ket iti ilik ti narrativo met laeng
ti kinadaksanggasat, kas iti ipupusay
nga ammom nga umay iti di agbayag.
Ngem kas kadagiti natakneng
nga exilo, inyawidmo ti balikas
a kayatmi a mangngegan, umili man
wenno estranghero a kas kaniak.
Agkullay-ong ti kullapit a tian
ket ti nakain-inaka nga alikaka maidiaya iti balitang:
ditoy a maipasngay ti umuna a mannubbot
a darikmat, agtalinaayto nga agindeg
iti daradaran nga ilim nga awanan labas.
A Solver Agcaoili
Hon, HI
Dec 28/07
No comments:
Post a Comment