Inaldaw a panpanurnor kas kadagiti linia
Dagiti daniw nga ikur-itko iti ballasiw-taaw
Dagiti amin a rikna nga agtaltalawataw.
Iti Red Hill iti agsapa, sabatennak dagiti bullalayaw
A no agpabuya ket namnamada amin
Kalpasan ti adu a pannakaidasay dagiti sirmata.
Iti sabali nga ili ket nagpupuniponan amin
A di mangan-ano a kinnusit dagti palabra:
Filipino kontra iti adigi dagiti sao
Ilokano kontra iti supapak dagiti bannog
Santo Ilokano kontra iti kapadana.
Pana man ketdi dagiti sayangguseng
A dumteng ket umat-atiburbor
Santo agtalinaed iti lapayag
Ket sadiay a mangringgor.
Iti sardam, buyaem dagiti arimukamok
Nga isalasala ti pul-oy. Iti barukong a sumarot
ket sadiay, iti kapilia dagiti amin a panangliput
Ti mannubbot iti birtud, sadiay a bingayen
Dagiti posibilidad dagiti babantot.
Kas ti krus nga ibaklay.
Kas iti basnot ti arakattot iti puseg
Dagiti amin a makidilot iti grasia
Kalpasan ti panagpadaya dagiti ladek
Tapno ti lana ti sapsapo dagiti panagulimek
Iti laksid dagiti amin a mabuya:
Ti panagbirbirok iti pangiyunnatan iti likod
Ti panangnanam iti kayat a sawen ti nargaan a turog
Ti mangdilpat iti tamudo tapno maramanan ti bussog.
Bumabaak iti Red Hill kas kapegges ti anniniwan
A sumursurot iti dalan. Ngem iti paglikuan,
Yaw-awankonton ti silpo ti riro a kalman.
Iti salugan ti dalan nga agpadaya,
Sadiay a kumamangak iti ariwawa
Dagiti rikna nga agtabtabugga.
A Solver Agcaoili
Hon, HI
12-12-07
No comments:
Post a Comment