Agipasimudaag iti panagin-in
Iti idda ti arbis ditoy nakaisadsadan.
Iti wangawangan dagiti daan a rekkang
Kadagiti danum nga alad nga agtunda
Iti maseggaan a Pearl Harbor, mangngegko
Dagiti bomba a di napakpakadaan.
Amin dagitoy ket masirpatko iti malmalday a tawa
Nga inlukatko a kas panagimbag-a-bigat
Iti Apo Init a gumawgawawa, mangikakaasi
Iti indolhensia kadagiti bantay iti daya.
Mano ngata a taaw ti dalliasaten
Dagiti raya santo makitinnibnok
Iti agmaya nga arbis santo agpaarayat
Iti daga? Buyaek ti aglua a langit manipud
Iti siled a nalamiis, iti bangkay
Nga idda, iti ulimek a tumukno't
Sadi law-ang sana kunaen, Siak, siak
Ti ulimek dagiti amin nga inauna a ringgor
T darundon a ringgor dagiti amin nga ulimek
Ket iti buttaw a bakrang a nangidiaya
Iti tadem iti tadem, sadiay nga agindeg
Dagiti managanan nga aligagget.
Kas iti panagsuek ti agpaparaw a pirpiroka
Wenno ania ditan nga agarakattot a billit a tuleng
Tapno iti maipumpon a puseg ti law-ang
Isalakanda ti natalimudaw a samiweng,
Daytoy induldlin kadagiti amin a bolsito
Ti nabiag a balikas dagiti arimukamok
Nga iti agmatuon aganiwaas, agragut.
Balinglingek ti pungan, manen ken manen.
Siglotek ti ungto ti abel Iluko nga ules
Tapno ti maradara a garit daytoy
Ket agbalin a pangontra ti dakes a tagainep.
Ditoy adayo, asideg dagiti sinansantilmo
Ngem, a, ta ipennekmo ti agidda
Wenno agtugaw wenno agballusong
Sakanto agpayubyob iti rungrong
A no agsellag ket ala agmauyong.
A Solver Agcaoili
Hon, HI
Dec 22, 2007
No comments:
Post a Comment