MANILA, Philippines -- The family of Marilou Ranario expressed their gratitude to President Gloria Macapagal-Arroyo for saving the Filipino overseas worker's life, even as they appealed for more help so she could be reunited with them.
Inquirer, Dec. 12, 2007
Paintayo dagiti amin a pain.
Igarangugongdatayo koma pay
Kadagiti abut no mabalin
A ta ania kadi met kaes-eskan
Ti karsel a mamimribu a masangal
Kadagiti amin a lugar a pakaipalladawan
Ti kired wenno laing wenno nakem?
Agdios-ti-agnginatayo iti agnanayon
Kadagiti amin a kita ti mannakabalin
Ditoy daga a kas sadi langit
Ta ita nga aldaw, iti panaginnallawat
Dagiti dakulap iti dara a kuarta
Kuarta a dara met ti linteg
Kadagiti panagmaymaysa a malmalday.
Igabsuonmo, babai a balud,
Dagiti amin a kita ti dung-aw
Iti lasag dagiti kas kenka
A masapul nga agtalawataw
Tapno iti labes dagiti nakaikailian
Ti kadkadua ket sadiay nga aramiden
Ti ritual ti ginnasanggasat.
Uray ta sindadaan ti ili a mangaklon
Kadagiti babantot, ken iti unos
Ti pannakaibaratilio ti wayawayam
Kas kadagiti wayawaya met dagiti sabali,
Addatayo nga agur-uray iti paspasablog.
Ilisidaka ken patay, basnot, latigo
Ngem saan iti didigra ken iwa ti bain.
Sangkapulinto ti agikaro
Kadagiti nagtagisugat a duayya,
Pangan-andingay iti ridep a maikawa.
Iti sabali a bangir, aguraytayo
Iti indulto dagiti amin a sasanto
Kas iti indulto dagiti amin a pangulo.
Idiayada dagitoy kas patiray-ok
Tapno inton bigat sumrektay iti palab-og.
Daytay panangbalabala iti kanibusanan
Manipud iti urok dagiti agpagunggan
A ranggas iti ili a pinanawan.
A Solver Agcaoili
Hon, HI
Dec 12/07
No comments:
Post a Comment