Nacion de Ladrones
MANILA, Philippines - “We cannot afford a government of thieves unless we can tolerate a nation of highwaymen.” The late publisher Joaquin “Chino” Roces issued that caution, after receiving the Legion of Honor award from President Corazon Aquino.
It’s been 19 years now since Chino spoke as “the Dreamer of EDSA People Power.” But the themes he stressed remain relevant. They reverberate in corruption surveys as well as in everyday email.
“We were the victors in the 1986 drama of good versus evil,” Roces said. “[But] our people will never forgive us if, in the act of reconciliation, we fail to exact justice…and prove that crime pays.”
Juan Mercado, “A nation of highwaymen,” Inquirer, Dec. 10, 2007
Uppat a siglo idin ket daytan ti awagda ita:
Republika dagiti mannanakaw a panggep.
Immay dagiti mammuniag, segun iti maikanniwas
A pakasaritaan. Babaen kadagiti benditado a balikas,
Nagparintumeng dagiti umang-anges a bigat, ta, ania ngarud,
Mannanakaw iti dayaw dagiti imperialista a nagarmas
Iti puraw a dios. Ladrones, kunada met, kadatao,
Wenno kabron ken simberguensa,
Ta ania ngarud ti yawag iti sabali no di awag
Iti bukod a bagi? Sabali a rupa ti mannakabalinda:
Nakusiaw ti kudilna ta dina am-ammo ti init
Tundiris ti agongga ta dina maangot ti nabungsot
Iti sakaanan ti altar a lumotlumot
Olandes ti buokna ta saan ngamin nga ay-ayamen
Ti alipugpog a no agkarayo ket agaponda iti duyog.
Ket ita, sibibiag amin dagitoy.
Nasaetda ketdi a mangikalikagum
Iti maiselselda kadagiti sulsuli
Wenno aminen a pagidulinan iti kinurimes
Kas iti nadayaw a nagan
Kas iti prestihio ti kaamaan a naggapuan
Ket kunaenda, kunaenda, Kasano, kasano,
Kasano nga agtakaw ket baknang?
Adu dagiti impabus-oy ti ili kadagiti panginaen,
Kas iti pangulo a nagmaris iti salakan iti amarilio.
Wenno ti pangamaen a no agideklara iti pammagusto
Ket malisayantayo iti pangep-ep iti bisin a tabako.
Sunotan ti birkog dagiti amin a birkog
A no agsuitik ket kasla pelikula amin
A ti bannuar ket di manibtuog uray no madisnog.
Ket itan, ita ngatan ti kapeggesan:
Ibarbaratilioda man piman ti amin a kinapimpiman.
Kasla ka la tumawar iti rumrummuar ti bagisna
A galunggong, yawid iti taeng santo adobuen
Ket iti radio ti babai innanto kunaen,
Ti pagilian sinalbarkon, nasalbaren!
Ala ket ipantay latta a rikna ti agnobena.
Iti udina, agrapiki ti kampana.
A Solver Agcaoili
Hon, HI
Dec 12-07
No comments:
Post a Comment