Alienasion iti Agsapa Ditoy Ala Moana Park

Maysa nga isusurnad daytoy, kas iti templo.
Sabado no kasta a panunotek ti balikas a makaagas

A rumkuas kadagiti allon, iti man panawen
Bagyo wenno linak wenno gurruod.

Wenno iti kanito ti panagbagamundo
Ti kararua a kadarrato a mayaw-awan,

Ikaykayab ti angin a yanak ti dalluyon
Kadagiti sirmata ti baybay nga umel,

Saksi dagiti pasdek a kalub itan dagiti rebolusion
Panagsakup panagparukma panagkautibo

Kadagiti ragsak idi un-unana a panawen
A ngem ta ita ken inda metten bayadan,

Kas iti nangina a presio dagiti sardam
Ditoy Ala Moana Wenno iti Waikiki

Kadagiti amin isla iti daytoy a paraiso
Nga adda iti wangawangan ti peligro

Gapu kadagiti gagem, nagtagilasag
Kadagiti kinnikinni ti manguy-uyot a malem.

Isuratko amin dagitoy a buya ken baningrot
Ikur-itko iti kuaderno ditoy pusok.

A Solver Agcaoili
Hon, HI
12-12-07

No comments: