Some eight million Overseas Filipino Workers (OFWs), still citizens of the country, left to seek work abroad, attracted by jobs with salaries that far exceed those in the Philippines. Others left simply because there were no more jobs available in the country. To survive, the Filipino Diaspora became inevitable. Manuel Amora, Inquirer, 12-12-07
Naganantay iti husto daytoy a pasamak:
Agkatangkatangtayo kadagiti sabali nga ili
Ta kasta ngarud ti kapay-an
Dagiti daksanggasat a kakabsat, ila, iliw,
Ken aminen a kaibatogan ti panaglangan
Iti man padaya wenno ti innala dagiti rikna.
Kastan idi.
Kasta pay laeng ita
Iti di mamingga a panagkurri
Dagiti atiddogen nga estoria ti ipapanaw
Ken panagsubli.
Ti ipapanaw a din panagsubli.
Di la ket ta ditay patien ti nangisit a waragawag
Iti nabungsot a ngiwat dagiti marabuaya.
Mensahero amin dagitoy iti sutil nga ayat,
Daytay man nagpaiduma a panagwaywayas
Iti ubing a sellang dagiti idda
A no agkulibagtong ket sakmalenda
Amin a saning-itayo.
Iti kapitulo uno bersikulo dos ti waragawag,
Ibagana dagiti nagtengnga a sasaiddek
A ditay naganan, ditay kayat a naganan
Kadagiti kakaisuan a kanito ti panaggargarakgak.
Adda engkanto ti agkakannayon a patpatiray-ok
Dagiti pangamaen ken panginaen ti ili a no umagibas
Ket tang-ed ken tung-ed laeng ti inda kasukat
Ket addadan kadagiti tangatang
Ket addadan nga umagak-agek iti tapok
Ti ili a pagsangbayan. Kasanotayo ngarud
Dagiti pada nga asi-asi, kinnaasi amin a di mangan-ano
Ti ikut a papel ket iti maris ti berde a pasaporte sadiay ti inggana
Ti linteg dagiti amin a linteg agraman ti panagbaybay-a
Dagiti balikas napnuan turay?
Bungonentayo dagiti lulua
Ket ipenpentay iti karton a balikbayan.
Ilukontayo dagitoy iti surat a kadenna ti tsokolate,
Dolse, ay-ayam, tualia, segunda mano a lino
Ken ti makidkiddis a puso.
Iparipiriptay ti ibit dagiti pungan
Ngem saantay nga ibaga a ti talimudaw iti basin
Ken bain ken di manglanglangan.
Bannuartayo iti ili. Kasta kadi lattan.
Idulintayo iti lansad dagiti lagip ti kapay-an.
Iti panagsagawisiw, intayonto latta ikantan.
Ta kasta ti kayat ti ili, dagiti panginaen, dagiti pangamaen.
Awan rigrigat, ken amin ket nam-ay ti adda kadagiti pasarabo.
Bay-an nga iti barukong ket ti bumbumtak a dudungso.
A Solver Agcaoili
Hon, HI
12-12-07
No comments:
Post a Comment