Lana ti Pauli

Dapadapem ti gurigor iti muging
Ket bay-am a dagiti amin a darikmat

Iti kaliado a ngudo dagiti ramay
Ket ibagada dagiti insakibot a panaas.

Naliday dagiti daniwmo, kunaem kaniak,
Ina a mannaniw. Ngem uray ti saludsodmo

Ket pagmurumoran dagiti maapiki a kanito
Dagiti maamitan nga agdaldaliasat

Masammukol ngamin dagiti agbaliwangga
Nga ayat iti agdardara a panid a kas met iti puso.

Sumuknor ti inauna a bara iti pispisko
Sa iti teltel ket mangliwat ti isem a bumarito

Kadagiti agmamayo a bibigko nga agbengbeng
Iti lamiis dagiti linawas nga awan dagiti pagel:

Dagiti bulintik iti lakko ti agragut nga ima
Wenno ti kudisi iti salikad ti umuna a lagip

Dagiti kasadar iti kalgaw a makugit ti isip
Kadagiti agrengrengngat a bengkag

Tapno sadiay ket bugtakenda ti dingnguen
Kas iti panangbugtakda iti agpakpakada a malem

Tapno siguden ti bulan ti agpabuya
Iti karkarna nga anal-al dagiti anniniwan

Kadagii suksuksok a paglilinnemmengan
Kas kadagiti natebba a lambaan

A testigo dagiti darang nga agkamang
Kadagiti urat, sa iti gumawgawawa a pus-ong,

Sa kadagiti mapartuat a pangsukal
Kadagiti dumteng nga an-annong.

Alaen ti lana ti pauli iti sagumbi
Arikapen iti banglo daytoy

Ti agas ti agsaksakkidol a bagi
Tapno kadagiti mababain nga alimpatok

Ti maalay-ayan a kari iti agpatnag
Sadiay a biroken ti matagibi a ragsak.

A Solver Agcaoili
Hon, HI
Dis 19, 2007

2 comments:

Ka Loren said...
This comment has been removed by the author.
adam said...

Hello I just entered before I have to leave to the airport, it's been very nice to meet you, if you want here is the site I told you about where I type some stuff and make good money (I work from home): here it is