Obrero nga Adipen

Masapulmi ti tulongyo iti panangirupirmi iti kalinteganmi, dakami a mangmangged kadagiti otel. Ita, dimi ammo no ania ti sumuno a mapasamak kadagitoy a pamutbutengda kadakami.
Randy Villanueva, obrero iti otel, Waikiki, iti programa ti radio, Dis. 8, 2007

Arikapek ti tibbayo iti barukong.
Adda sadiay ti unget.
Dimon ikkan iti naganna, kabagis,
Kuna ti unget. Bay-am a dagiti siled
Ti agparikut kadagiti rumbeng
A mayebkas tapno dagiti ling-et
Ket maagasanda man iti agnanayon
A pitik kadagiti pulso a mabibi
Ta awan ta awan
Dagiti agsampaga a kayanga
Wenno naridam a kalunadsi
A kaang-angot ti talon a mamuriski.
Braso, ima, pispis, teltel,
Luppo, ken ken ti isem:
Dagitoy man dagiti igam
Iti binigat a panagmalmalanga
Tapno pabus-oyan ti rikna
Nga agawis iti pagilian.
Babaen ti tamudo nga ilibas
A pangitudo iti langit
Nga estranghero met,
Surotem ti agtayab a pulkok.
Napipia pay nga agas daytoy
Ti dagensen wenno pakarikutan.
Biroken ti mapa ti Ilocos
Iti pultakpultak a tangatang.
Sadinno kadagiti kimmapas
Nga ulep ti rugi ti kanibusanan
Tapno obrero ket aginana?
Kadagiti sumuno nga aldaw
Agawidto iti sidong dagiti aginaldaw
A rigat a no agpaarayat
Ket agbalin nga indulto amin a kararag.
Anusan kadi lattan a yilad
Ti bannog, yunnat ti ranggas
Tapno iti kasta ket mabigatan
Pay laeng ti anges?
Bannuarkami kano kadagiti amin a rigat.
Bannuar ti ili a no agawid ket kasingin
Dagiti amin nga ipasarabo a








A Solver Agcaoili
Hon, HI
Dec 13/07

2 comments:

Ka Loren said...

kaano, kasano, sadino koma a nagbalin nga amo dagiti obrero, maestro?

ariel said...

No ammom la koma ti sasaaden dagiti Ilokano ditoy Hawai'i, dagiti Ilokano a napaidaman iti adal (85% dagiti Filipino ditoy!) ket ti estoria ti opresion a pakairamanda idi ken ita. Ditay nalpas ti wayawaya.