Kadagiti dragon ket ti apuy a mangsilmut
kadagiti kapanagan. Iti nagan ti pitak
ken ti tapok ket ti alikaka dagiti lungon
ti panagindidi dagiti panteon
ti panaginsasaan ti punebre
numan pay patit ti kampana iti soltero a torre
ket daytay musika ti maitanem nga ay-ay.
Kastoy ti abstraksion ti masungad a tawen.
Kas iti sala ti adipen, agkurratsa nga agsaridaddeng.
Agarikenken met kas prologo dagiti paddak
santo agkulagtit iti napardas
mangsala iti sabali nga ayug
a mangawag kadagiti amin a birtud:
ti panagsubli iti bagas manipud iti ugaw
ti panagpakita manen dagiti dalag iti banggera
ti panagapu ti asin iti tubong
ti panagungar ti paglutuan manipud ken kissiw
ken patay ken aminen a pannakasebseb
ti arimukamok man a nadawel
wenno ti katay ti lalaki a nalaing
nakapatig wenno nakakurbata
a ti dila ket naggapu iti apokalipsis
tapno kadagiti buteng iti sellang
sadiay a rugian ti maraochoocho a panagaddang.
Ited amin a talek kadagiti kanito ti tawen,
amin, agraman ti riwriw a panagbabawi nga umuna
saan a maudi kas iti panangontra
iti lusis a suyot wenno ti bawang a di met aglibbuong
no di ket agpangato iti tangatang nga agpuligos
santo met laeng agdisso iti nagiparabawan a lata a lussok.
Kuitis kadi ti pangbugiaw kadagiti mannamay
ti panangpadisi kadagiti mangmangkik
ti panangpapanaw kadagiti agsinanbuaya nga ansisit
a nagkaporete iti anus ti leddeg ken bukasit?
La ket ta ilukat dagiti tawa
ket ikkam iti bitinbitin a pisos
wenno doliar a naiwawa. Anting-anting dagitoy
para iti nabunga nga aldaw ti din panagpagungga
dagiti babaknang a silalabus no mangan iti ostia
dagiti marigrigat nga agidulin iti tedtedda.
A Solver Agcaoili
Hon, HI
Dec 29/07
No comments:
Post a Comment