Umuna a Puni para iti Pagilian

Umuna, alaentay ti kalendario
Iti pagpupurokan. Datayo amin:

Babbaket, ub-ubbing, lallakay.
Datayo amin: agpampanunot

Ken agtabtabbaaw. Uray dagiti mannurat
A kawaw ti utekda, mairamanda

Tapno addanto agisurat kadagiti pammadayaw
A ngem, ngem saan kadi a, nga isuda

Ti adda kadagiti linabag
Ti nabalitokan nga aldaw

No di ket amintayo, datayo nga umili
Datayo a nabayagen idi ket din nakakita

Iti puni, wenno nakirinnay-a kadagiti malabi
A no masakduan ket agubbog kadagiti parek

A mangpasam-it iti baak a basi
Mangpasanger iti arak tapno iti lamuyotna

Iti karabukob ket kas met laeng lamuyot
Ti agsala a pus-ong, lasag iti lasag

Dagiti aginnayan-ayat a mangikarkarawa
Iti ragso kadagiti nginabras ti pakasaritaan

Nga ikut ti maudi a puni dagiti maikanniwas
A taraon, kas koma iti pukpuklo a para

Kadagiti babaknang, ti gamet ti Bangui
A para kadagiti kabagian idiay Hawai'i

Ti darangidangen a mangga a kasla pingping
Ti balasang ngem maisagut iti daga

A nakaimulaan dagiti amin nga ulpit.
Makipuni dagiti kaibaan ket italawda

Dagiti ugaw sada ipalladaw iti ungto
Dagiti ballasiw-taaw a rugi ti panaglagaw

Dagiti pangrabii a nagabay.
Mansuentayo ketdi ti agpanunot iti potahe:

Igado dagiti amin a raman a nalipatanen
Kas iti silet nga ingkipasen ti panglakayen

Wenno ti Hawayano a no gumatang
Ket kasla arsab ti dingnguen.

Wenno 'tay pinakbet a no gawen
Ket kasla man sidaen ti sangapangen.

Iramanmo ti insarabasab a no malagipmo
Ket ti bakam nga inaggaagab dagiti malalaki

Iti rehimen dagiti mannanakaw
A no mangngaasida ket agam-amangaw.

Masapul a panunoten ti aros-Valenciana:
Bannog daytoy dagiti amin a marigrigat

Ti sili ket ti amin a kaasi nga impaay ti santo patron
Ti rekado a sabali ket ti idaton a kansion

Kalpasanna ket yayab ti pannangan
Ngem unaentayo, raemen a kailian

Dagiti tattao a babaknang
Dagiti natuturay a mangbasbas

Iti kinakurapay. Sirmataentay ti imas.
Ganasentay ti mabati no di makipas.


A Solver Agcaoili
Hon, HI
Dec 17, 2007

No comments: