Sabali a pinarsua ti maratangtang
Agpili daytoy iti pagindegan
Kas iti palasio dagiti pawikan
Iti maar-arinebneb a pagilian.
Mansuenda latta a pimpiman
Ti babai a maratangtang
Ta an'a ngarud ta agkibaltang
Ti panangisagutna iti atang.
Atanganna koma ngamin amin
Ti presidente dagiti lati a karbin
Ti nagikari iti panangipirit asin
Iti lugawlugawentay a bisin.
Maratangtang karuprupana
Agambision iti uray la nga
Agiyeksport iti kailianna
Pagdoliarenna ti pigsada.
Sananto kunaen, daytoy piman
A ti ekonomia bimmaknang
Idinto ta ti kasutna ket piangpiang
Dagiti babbai nga agkuyangyang.
Wenno dagiti amma a madukotan
A no agpagungga mangraut lattan
Ibagsolda nga iwekwek ti igam
Iti bakrang ti akimbakrang.
Ta kastoy ngarud ti adda a kapay-an
Ti ili nga agingga ita pagang-angawan
Ili a lamlamiongen dagiti tao a siriban
A no aglaingda ket aminda agsamusang.
Maratangtang, a wen, maratangtangda amin
Lalaki man wenno babai simmangkalaing
Isaldada amin uray no ti ittip a timmangken
Uray ti apro ti iti derrep nga agalimuken.
Dinto mamingga dagitoy a pasalsali
Agingga a ditay inggaan a di aguni
Ungapentay balay dagiti maratangtang
Ilamawtayo iti agburburek a sinublan.
Luttuentayo ida satayto ipasango
Kadagiti kapadada nga agabauyo
Dagiti agab-agabrakadabra a palalo
A ti kada kunniber ket presio't piso.
A Solver Agcaoili
Hon, HI/Dec 8-07
No comments:
Post a Comment