ANGELO, TI ANGEL ITI LANGIT--GODSPEED, BALLONG

ELEGIA KEN ANGELO
Maysa a daniw-nga-araraw para kenka, ballong.

(Rhauz Angelo Corpuz of San Nicolas, Ilocos Norte became the second person to die from stray bullets this year following three-month-old Von Alexander Llagas of Caoayan, Ilocos Sur. –gmanetwork.com, Jan 02, 2014.)

Kanagnaganmo ti anghel de la guardia.
Agbantay daytoy iti pannurog, sa iti panaginana
Kadagiti amin a rikur ken sikor ken ngatangata.

Sika itan, ballongmi, ti mangibabaet kadakami
Tapno ti autor ti biag ket innakam sirigen
Matmatan a kas iti umaasintada tapno kidagen

Arribisen kas rumbeng, wenno appiguden
Kas kidkiddawen ti ubbaw a paniemna
A dakami ti rugi, dakami met ti gapuna.

Sadinno a nagsirko ti bala a silpo-ti-riro?
Ania a parte ti bangabanga, ania a disso iti sentido
Tapno iti apagkidmat ket ti dangadangmo

Iti oxigeno, kas iti idda a nakaigalutan ti ubing
A bagi, dagiti saka a kalkalpas ti kinamaladaga
Tapno sursuruen ti agaddang, magna,

Mapan kadagiti amin a sulinek tapno ditoy
Ket maarikap ti kaipapan dagiti uni ti al-alia,
Bunggaria, ma-o, amin a pamutbuteng

Tapno idian bassit ti panagbayanggudaw
Panawen ti sipnget tapno mapan iti narayray a silaw
Ket sadiay agkumbawa iti tured ti mangrabrabii

A marmarna, daytay agkayabkayab a kulibangbang,
Daytay insekto a masalamangka iti bara ti apuy
Tapno mangideklara iti mortal a wayawaya?

Ti Namarsuam ti manarabay kenka, Angelo.
Ti Namarsuam ti mangisuro iti tunda a kaikarian
Tapno ditoy, iti baet dagiti saning-i ket ti salakan

A para kenka. Iti sabali a bangir, ipatulodmo
Kadakami ti tanamitim, daytay naumbi, ballong,
Daytoy sumarut iti kararua tapno inkam mamakawan.

Hon, HI/2 Enero 2014

No comments: