Von Alexander Llagas,
3 a bulan
MANILA,
Philippines—A three month-old baby was killed while another child was injured
by stray bullets as Ilocos Region welcomed the New Year, police said.—Inquirer,
Jan 1st, 2014
Saksi ti Anonang, ballong, ti ibit
a mamangpadanon iti baro a tawen
nga iti dung-aw ti ina ket agbalin a daan.
Wenno lagip kenka iti apagapaman.
Dimtengka a kas kometa,
ket ita, kalpasan ti tallo a bulan
a ray-ok, ket pumanaw a kas
iti asuk dagiti palibbuong a karsel
ti isip a mulmulluong.
Sika ti masindadaan a rupa ti aramidmi
nga agipalladaw iti bala ti barusngi
nga ayat tapno iti idda ket ti agsayasay
a dara.
Tinagtagainepmo kadi ti anghel
sakbay ti iwewekwek ni patay
iti maladaga pay laeng a selula
tapno sadiay, iti delikado a pupugsatan
ti anges ket ti sakit iti kapay-an,
sika nga anak dagiti naumbi nga apros,
ti rabii a managsangal iti duayya,
ti idda a mangabel iti liwanliwa?
Kasano ita a sarangten dagiti dadakkel
dagiti babassit ngem tibintibin a karit
tapno iti daytoy a tawen ket mangitunda
iti sumuno pay, tapno iti kada panaglupes
dagiti uleg iti daan a lagip ket ti panagkudil
manen iti baro idinto nga awankan ita,
addakan kadagiti law-ang a kas iti angin
nga umay para saan kadagiti baet
dagiti amin a kinaawan?
Idanonmo, ballong, dagiti ararawmi
iti Namarsuam tapno kadagiti pauni
ken paaweng ti baro a tawen
ket ti pammakadam iti bala
nga iti pannakaiwawa
ket ti pannakagudasen.
Ala, sumurotkan iti anghel.
Guardiaanka agingga kadagiti alinuno
ket pagkalmaenna dagiti aluyo
tapno iti ibaballiasat iti karayan
ket ti umis-isem a paraay-ayo.
Hon, HI/
Enero 1, 2014
No comments:
Post a Comment