Sumilao, Sumilao

FARMERS MARCH TO ATENEO. Supporters accompany farmers from Sumilao, Bukidnon as they enter the Ateneo de Manila University where they will stay the night before marching to Congress. Composed of Higaonon tribe members, the farmers are seeking to reclaim a 144-hectare parcel of land in Barangay San Vicente, Sumilao. They have marched from Mindanao to MalacaƱang to press for ownership of lands given but "taken away" from them.
Inquirer, December 6, 2007

Siglosiglo ti isu met laeng nga isu.
Ket ita nga aldaw, iti kararag kadagiti manangngaasi,
Dawatentay ti panagtangeb ti langit ken daga
Ta mapukaw amin a pakariribukan dagiti mais
Pagay kagaw alsong atang ti panagbatiwerwer ti kimat
A mangkin-od iti agpuerong a galad ti ikan
Wenno panagimmimikki ti komedor
A naynay a manglanglangan
Agimmamadi iti maidasar a taraon manipud
Iti pigsa ti mannalon nga idi pay ket agpalpalama
Gumawgawawa iti lames ti taaw ken ti daga.

Kinautiboda met ngamin piman dagiti bang-i
Ti bengkag sa ti tudo sa ti arimukamok
A paaklili iti linnaaw iti mata ti rebulto a dios
A no sagidem ket agurok.

Mailibot dagiti dagensen, kas iti nakamanto a birhen
Kas iti mapadso a mesias dagiti nakakurbata a gagem.

Isuda met laeng dagidi a kabusor,
Maysa a pangen dagiti aggaagab iti katkatawa
Iti duag wenno arubayan no kasta nga agdarudar
Ti ayat, agbugi dagiti rabii iti imnas tig-ab
Wenno samiweng nga iti kaunggan umukuok
Sadiay nga agbalay, agapon kas iti billit-a-tuleng
A no agkayab ket sumurot iti arbis ti dam-eg
Wenno iti bayakabak ti sao nga alikuteg
Agsawar kadagiti beggang iti pus-ong
Nga agalumiim nga agpasugnod
Ta agpabus-oy ngarud ti sardam
Kadagiti sagawisiw a makapabang-ar
Wenno dagiti arasaas ti pungan
Sa ti ules a no agisem ket di mapilawan.

Kasano nga agrebolusion, kas pagarigan,
Dagiti rangaw ti utong wenno ti uggot ti paria
No dida maawatan ti kayat a sawen ti tamnay?

Saan nga iti daga ti 'yan ti rugi dagiti amin a sennaay.

Adda kadagiti sao nga isawang ti padi ti rigat.

Adda kadagiti panagkuros iti muging dagiti kurimaong
Iti nam-ay, pannakakiki iti gargari ti ayat nga agtagibalay.

Ebanghelio, kunada, ebanghelio ti panagmulaggat.
Wenno ti kusilap kenka kadagiti agsaraaw a malukong
Gapu ta ti digo ket ibienesda iti limos ti tangatang.

A ngem ta saan a kas karina ti mangipaay iti anak
Iti manglengnges a beklat, wenno 'tay gitaan nga uleg
No dumawat piman iti karayo dagiti paggaak
Nga ubbaw ta an'a ngarud ket baribar
Met ti urit ti arado, iti nadayaw a langit a sumarot
Agpaisalakan, saanton nga agpasugnod.

Agmartsakami kas idi punganay.
Iti kada addang a birokenmi ti tarumpingay:
Kada addang, kada dagensen iti balligi dagiti pasaw.


A Solver Agcaoili
Hon, HI /12-06-07

2 comments:

FBLorenzana said...

Sapay koma ta mabasa met daytoy dagiti gamsaw, dagiti agtatakaw ti tagainep ti latok ken ungot, dagiti balintungeg a bingkol ti bengkag, ken dagiti sunget ti arasaw.

Adda latta a nakatayok ti gemgemko. Uray agdaran ti pungo-pungnguak. Agabay ta, Ka Agca!

Ariel said...

Ala wen, ditay mamingga! Agbiagka, Ka Loren.