kuna ti chat box.
Agis-istaring dagitoy
a mannurat nga iti dudungsa
ket namak pay nga iyalat
ti verso a balitungeg
a ti kudit datdatlag.
Sadinno aya ti rugi
ti matalek a pluma nga agsaksi
iti leddaang ti aribai, musa
iti Ilokano a biag
a saan nga iti panagbirok
iti nalimbong a palakpak
dagiti ing-ingungoten a kakabsat
isuda nga agsubalit iti sipsipat
iti bangbangir nga isem ti darikmat?
Maysa a profeta
ti mannurat, patgen a manakem
a mannurat.
Maysa a rebelde
ti mannaniw, patgen
a manakem
a mannaniw
profeta ken rebelde
a ti isip nasimbeng
kadagiti amin a gagem,
kas iti bukod a saem
nga iti ulimek aglemmeng
saanna nga irakurak
ti kinadatdatlag
dagiti versikulo ti panagayat
iti pluma kas iti papel
a sairo ti lasag
nga agbirbirok
iti mayepyep a linabag.
Saan a ti pluma ket panandi
kadagiti di tagtagiur-urayen
a kaltaang
iti agluloken nga utek,
wenno ti sentido nga ubbaw,
kas kadagiti sarita
nga ibaratilio ti tabbaaw
iti man panagtutungtong
wenno iti nalaes a katay.
Saan a panagistaring
ti rukod dagiti amin
a makapagungar a meditasion
ti di mabaldado a balikas
a kasilpo ti nainkalintegan a biag,
di mangdusdusa nga anges,
panagimtuod a pangwada iti akikid
a desdes ti utek,
panagikasaba a sitatalna
iti promesa ni takneng
laing ken sayaat iti umuna
a linia a manakem
saan
nga iti panagbarayuboy
kadagiti pamilawan
iti aweng a nasam-it
wenno timek a babassit
numan pay adun
ti pakapilawan
iti merkado publiko
ti binnilangan
iti nagapuanan.
Ti adipen ti pudno a daniw
aramidenna a piho
dagiti saning-i ti ili,
idokumentona
dagiti amin a trahedia
nga iti pakasaritaan
ket daytoy
ti il-ilalaen a tagibi
saan
nga iti panangitag-ay
iti bukod a kopita a balitok
ti ammo
wenno ti panangiyukkor
iti tanso a medalia
a sagut ti pagayam a katok
no di ket panagtestigo
a ti mapadara a sao
iti kada linia a gumawgawa
iti kinalinteg dagiti aldaw
iti kinasimbeng dagiti panirigan
iti kinaapagisu ti naimbag a gasat
daytoy,
daytoy ti makaispal
kadatayo kadagiti amin
a dagensentayo,
datayo a mannurat
nga insarua ti biag
naisinggalot iti drama
ti lugar ken panawen iti Ilokos
dagiti taga-Ilokos
tapno makasursurotayo
kadagiti makaispal
a pangngarig kadagiti malaglagip
a kinelleng, bambantay, turturod
kadagiti paratong ken lusod
dagiti ayat nga agpaspasugnod
daytoy,
daytoy, iti dara
dagiti linabag
a mairugi ti ritual ti panagsublisubli
tapno manen ken manen
sumuknal kadagiti templo ti puli:
iti lengguahe, kas pagarigan
a balay dagiti agas a kasamayan
ti kararua a no dadduma
ken agpampamayan
ti panagugas
iti atiddog
a dila nga uray iti ballasiw-taaw
ken magtengna dagiti dalluyon
makirinnapukrapok kadagiti allon
tapno kadagiti damag ket sadiay
ti il-ilalaan a sabidong
ti panangballaag
iti sidingan
a bibig
ti panangikipas
iti kusit dagiti in-inauna
iti man narugitan a dakulap
iti man nauringan
a versikulo ti panagarida
dagiti mannaniw a rapas
dagiti mannarita a di agkupas
dagiti sumasalaysay
a di met makapudno
dagiti mannanao nga agbiag
iti pamarpardaya
dagiti pammadayaw
dagiti atanud iti pluma
ken pirak
dagiti amin nga iti pakasaritaan
ket husgana
di mainsasaanan.
Matda nga agsisisiim ti bileg
ti pakasaritaan kadagiti maiwekwek
a sarita, maiduyok
iti puso ti daniw
ti mannurat kadagiti nasantuan
nga iliw
iti man panagpanpanurnor iti dana
ti pannubbot
iti man panagbirbirok
kadagiti naganas a balikas
a ti kaasina ket agsisimbalud.
Saan
nga iti panangitag-ay iti ammo
iti nagapuanan agpayso man
wenno bunga ti nakaitudingan
saan
nga iti panangirakurak iti laing,
uray no ibaga kas evanghelio
ti ngiwatan a martin
wenno ti saosao a loro
a no agkararag ket agdepped
ti madalanan ti angin
saan nga iti panangideklara
nga uray no sumagmamanokayo
ngem nasisiglat ta agistaringkayo amin,
saan, saan a dita ti pamkuatan
ti kanibusanan ti pang-aw ti palso
a daniw nga arindaniw.
Rugi daytoy ti mannurat a tabbaaw:
kukuayo amin a galad
amin a panungpalan dagiti pannubad
dagiti agkikinnamala a masakbayan
dagiti paulo ti daniw a magatadan.
Ti makaispal kadatayo
manipud iti rehas dagiti balikas
a makaisagut wayawaya
ket ti panangidaniw
iti pudno rikna ni agay-ayat iti ili
iti sagrado a pagsasao dayta nga ili,
daraan daytoy kadagiti linabag
iti meditasion a sukal
dagiti sairo ken kaibaan
a permanente a residente iti rinuker
a panagisawang.
Saan
nga iti panagbilang dagiti naisurat
iti panid dagiti naimpagayaman
a palakpak,
nabayadan man dagitoy
wenno pangsulnit
iti kalanglanga ti imbag.
Iti panagimutektek,
sadiay ti anag ti sao
a mangitunda kadatayo iti law-ang
tapno kadagiti nalidem
nga ulep ket sawaren
ti di agpatingga a lawag
iti saklot ti agpatnag
a no agisem ket agkusilap
tapno kadagiti misterio
ti panaginnala ti init ken bulan
ken dagiti samiweng
manipud iti angin maitibnok
kadagiti makaalay-ay
iti rikna nga ayat
manipud iti makapabang-ar met
a balikas.
Agis-istaring,
kuna ti chat box.
Maibasar ti aramid
iti agnanayon a biag
ti sipupudno a sinurat
iti leksion ni pintas
nga ipasngay
ti nakaal-alikaka
a balikas.
A Solver Agcaoili
Hon, HI/Dec 24/08
No comments:
Post a Comment