Loteria ti Gasat idiay Roma, 1


Maysa a babai ti agdawdawat iti limos a kuarta iti asideg ti maysa a kiosko nga aglaklako kadagiti tiket ti loteria, idiay Roma. Associated Press, Nov. 20, 2008  

Maysan a dunggiaran a dekada
nga induldulinmo daytoy a buya.
Iti Roma nga imminumka iti arak
ti misa, sa iti agua bendita

Nagpakaasi iti sao a dimo balikas
kadagiti pader ti imperio dagiti pino
nga iti kitikit dagiti lagip nga antigo
ti pannakaikulbo a panangikulbo
ket nagpaiduma nga ipupusay
kadagiti naalikuteg nga agpatnag
iti suknalan dagiti awanan oras nga ayat
iti poder kas iti bileg
dagiti pagarian a dadakkel ken babassit
isu a dagiti addaan panaplit, dagiti dadaulo
kadagitoy a panaglablabes,
kautenda ti ngalangalada
sukitenda ti langitlangitda
kadagiti sardam ti panaglak-am
a pilpilit 
singaenda ti rusok
tapno agbakuar
santo manen agbasin
santo manen mangipauneg iti bubussog
wenno iti panagtig-ab
manipud iti ubas dagiti mabisin
manipud iti tinapay dagiti malislisayan
tapno iti pannakapnek
kauten ti ngalangala
sukiten ti langitlangit
singaen ti rusok
tapno agsarua
ibakkuar ti panagangtab
tapno manen agbisin
tapno manen ken manen ket mangan
iti siklo a di agpekka a siklo ti panagpagunggan.

Ket ti napanayag a torre 
dagiti amin a sakrifisio
ti maablatan a tagabo, nangisit 
iti puraw a panagmanso.

Napalangguad ti Roma 
uray iti kaadalman ti rabii ti Noviembre
ti nieve a mangsugat iti bibig
ti lamiis a sumuknor iti sellang
isu a surotem dagiti agmalmalanga a baddek
dagiti urit ti pannakaiyaw-awan
iti makariweng a piazza ti Vaticano
iti fontano ti Trevi
ket iti waneswes ti angin allingagen
ti ibit dagiti agpakawan
dagiti agdawat iti kaasi
kas iti limos ti manglanglangan
ti ipalimos ti aglablabunan

Kas kadagiti diamante a daraan 
iti korona ti Ina ti Mangisalakan.

Kas kadagiti amin 
a gameng nga awan iti dakulap
a maiyukrad iti agngirsingirsi a bigat
iti siudad dagiti agkalio a tumeng
iti pannakaar-arakattot 
ti bilbilangen a kinadaksanggasat.

Kuna ti damag: keso kanon ita 
ti ipalak-am kadagiti awanan,  
kadagiti marigrigat kalpasan 
ti panagsambuambo 
dagiti dati a nalabon a dulang

Parmesano a keso 
nga iti kaano man 
ket di pay nadilpatan
ni anniniwan ket di pay nasirip 
tapno koma mapagsasawan.

Idiaya ti babai 
ti kinakakaasina a henesis
dagiti ultimo nga indulhensia, 
kas iti panagdawat 
iti palimos a palama.

Agsaksi iti kastoy a drama 
ti agpampannakkel a Roma
dagiti amin a balligi iti pagbabakalan
ti kappia kas iti pagbabakalan 
no asinno ti makapudno iti langit
no sadinno ti dalan 
ti mapan iti apuy a di maibulsa.

Kauten ti lira sakbay idi ti euro
wenno ti doliar a kakaisuna a sinalbar 
manipud iti McDonald's 
iti koloseum dagiti katkatawa
nga itan ket rurog 
wenno pagsapulan dagiti akinkukua
Iti mangilupitlupit 
nga atiddog nga istoria.

Ited ti mabibbibi a pirak
iti kapada. Panunoten ti kaibatogan
ti kaasi iti salup ti bagas
iti sudo ti ranggas iti ili a rapas.  
 
Bay-an nga agam-amangaw ti buya:
agtibnok ti kapay-an iti ili a naggapuan
iti Roma a panawan.

Bay-an a dagiti numero ti mangeddeng
iti naisangsangayan a gasat itatta
iti kanito dagiti tanamitim
iti panangipulagid iti panio 
kadagiti nalamiis a saka
ti patron dagiti naimbag a gasat:

Ti sais-sais-sais tapno umadayo
ti demontres a demonio

Ti otso-otso-otso kas ita
tapno ililinatayo ti Dios Apo.

Kuna ti damag: itanggayada 
ti dakulap nga idi damo 
ket ti gumawgawawa
nga agnobnobena iti santo

Ken santa kadagiti kursada
ken agmamayo a pannakigasanggasat
kadagiti malmalday itan a kaskasaba.

Panawam ti Roma.

Awit-awitmo ti namnama.

Iti bulsito ket ti di imbunannag
a rurog ti kararag ti panagduadua. 



No comments: