Kautibo ti ranggas iti daga ti Dios, 1

GAZA CITY, Gaza Strip –Nagitennag iti nasurok a sangagasut a tonelada ti bomba dagiti eroplano a panggera ti Israel idiay Gaza idi Dis. 27. Adda iti turay ti Hamas ti nasao a lugar. Namkuatan ti pannakatay ti nasurok a 200 a tattao daytoy a kampania ti Israel kontra ti Palestino, kas panangdefensana kadagiti umilina iti agarup aginaldaw a panagpatayabda iti missile iti sakupen ti Israel.   


Dumket ti eksena iti muging
kas iti imud nga araken 
ti abal-abal no iti agsipnget
ket rumkuas dagiti al-allia
ti ganggandiong a kappia
iti daga a naikari
iti parikut. Ania a pallatibong
ti mangpugsat iti anges ti dua gasut
adda man bomba iti lukong 
ti dakulap wenno adda iti saludsod.
Ta kasano nga ilawlawagmo
iti tapok a ti bagi ket makasursuro
nga agdursok iti angot ti dara
nga iti ar-arubayan ti Gaza mailaok?
Agsusupadi dagiti aweng ita,
dua nga aldaw kalpasan ti paskua
ti pannakayanak ti maladaga
a mangispal kadatayo iti panaggaapa:
kanion kontra iti bato
panagipangta kontra iti pamutbuteng.
Kasano nga itabonmo dagitoy a buya
iti aglawlaw dagiti purok ti kappia
a koma ket buklen manipud
iti panagpakada iti panagkettel
kadagiti tagainep ti baro a pagilian
dagiti annak ti namarsua?
Asinno a Palestino ti di masugatan
kadagiti maburak a panggep
kas iti agwarawara riduma
dagiti bomba nga iti dulang umagep?
Asino nga Israelita ti di matay
kadagiti sao nga iti barukong ken punial
maitugkik iti amin a puon
ti panagsagaba iti antigo
a panagur-uray?
Di kadi ta maymaysa a bagi
ti naggapuan a puli
dagiti maris ti sabong
kadagiti tanem dagiti pimmusay
iti man Gaza wenno ti ruar
pakaimassayagan dagiti bangkay
a daniw ti rebolunario nga ayat
a kadagiti agek agruting, agbiag?

 


No comments: