Bimmalitok a Paskua iti Golden Coin

(On the spot a daniw, inkur-it iti padaya ti Paoay Association ken inkiddawda nga ibasak iti dayta a pasken a naangay idiay Golden Coin, Waipahu, HI, Disiembre 6, 2008)

Batido dagiti dila kas iti karabukob
Sumga dagiti rikna nga agkubakob
Tapno kadagiti panunot a mawagwag
Umukuok ti Paskua iti mabibi a lasag

Iti panaglalanglang iti Golden Coin ita
Ket rag-o ken rang-ay kasingin a kadua
Karagup gagayyem, mapartuat a lagip
Imaldit' dagiti kanito, italimeng ti isip

Nabalitokan a paskua, karkarna a pasamak
Nasinged a rabii diman mangliwat iti ragsak
Paskua nga iti agsapa nga iti idda ken lam-ek
Dumarang barukong no dalikepkep agrennek

Sala ken kankansion a pagraray-awan
Saan mangliway ti pinnalakpakan
Ngamin ta iti disoras a panagliwliwa
Ti basbas ti Namarsua ti namnama

Dayyeng ti pabuya inkam ngarud 'yawid
Ilaylayonmi nga iti nangina nga aramid
Ket ti sayaat iti kakadua, di pinnasagid
Kinaimbag kinnabsatan puera arsagid

Ngarud, papagayam a gayyem tured
Bendision iti maysa ken maysa ited
Kinaimbag nakem ti adda a taginayon
Kas panangiburay sagrado a bendision

Iti kastoy a ragragsak di maikapis
Dagiti iliw nga iti ili maiwallages
Sumurot kadagiti agdakiwas a banesbes
A kumamang kadagiti baybay a naapres

Iti rabii ket ti panagrarambag
Iti ragragsa a kasingin imbag
Panangsantiguar iti balbalatong
Panangipadto ti pudno iti kulluong

Datayo met ita dagiti saksi
Ayat ti Apo a manangngaasi
Datayo nga iti daytoy a tallaong
Kontra amin a kibalballiondong

T rikna kas kadagiti insenso
Ti mira kas iti balitok ti mago
Datayo ngarud iti ti aglak-am
Ti grasia a bendision Mangisalakan

Aglugaytay ngarud iti daytoy a rabii
Agsaludartayo iti maysa a tagibi
Nga iti riknatayo ket agbalin a kabsat
A gapu dagiti kailiw a kinasayaat

Naimbag a Paskuayo amin, kakabsat
Naimbag a Baro a Tawen, awan labas
Kadakayo a yawatko ti naimbag a gasat
Kadakayo ti parabur ti lawag di agkupas

Waipahu, HI
Dis 6, 2008



4 comments:

Ka Loren said...

Mayat Maestro. Sadiay laeng maikatlo a parapo, ti maikatlo a binatog, iti maudi a balikas ket 'ek' ti murdongna ken ti kaparisna ket 'ep'.

ken, sadiay maudi a tallo a balikas, 'lawag ti agkupas'. kasla saan a mataginayon ti raniag, he he he.

Kayatko laeng ti agkimaw, Maestro he he he. Ken naimbag metten, a, a paskuayo amin...

ariel said...

Ka Loren,
This is what you get when you write with a table napkin (napadasamon?) and then have all those napkin thoughts clog up your already clogged mind.

I did check it out with the kurrikurri skrats--and you are darn right. How can you be so right all the time, aver?

I offer these ways to correct the conceptual impossibilities of rhyme and its lack of of reason in a rhyme-for-a-reason scheme of flimsy poeticizing.

That darn 'ti' in the last line should not have been that either except that when your fingers are tired because you are already 75 years old in terms of struggle and battle, there you go: the 'ti' could be used to replace the original 'di'.

Mahalo for spotting those cumbersome mistakes. Now I can sleep the sleep of the pretending just.

Merry New Year to you.

Ka Loren said...

ha ha, i've to experience yet on napkins but i used to write sadiay sileng ti sigarilio a marlboro ket kalpasanna, nalipatak nga inkur-it ditoy komputer nimal, nakunesko ket naipuruakko metten ti basuraan. Su, napukaw daytay pangpalancan a daniw he he he. No ammoyo la koma no kasanok a sinubli sadiay puted a dram sadiay palengke ngem daksanggasat, naipakbo metten sadiay trak...

ariel said...

apo a mannananiw a dumadangadang-ka loren:

it goes with the trade, with our trade.

no agmanmanehoak ket diak maikuraddaddeng ti sumngay iti isipko iti panangletletsek ti trafik ditoy honolulu, alaek ti selfonko ket awagak diay ofisinak ket sadiay nga ibatik iti voice mail no ania ti pampanunotko idinto a pampanunorek ti dalan a kumamang iti pagbirokan iti binting ket pakisanggolan iti isip iti pannakidangadang.

wen, no ammoda la koma, ania, dagitoy a nakakaasi a pamuspusan dagiti mannaniw a kas kenka.

ala, agsigarilioka pay tapno ad-adu ti pasileng a maalam a pagisuratam. ken daytya marlboro red, a, tapno wild wild west ti panagipennekmo iti riknam.

that, i did as well, agraman ti panagsibbarutko kadagiti pagdaar kadagiti pasilio a malabasak maisurat laeng ti adda iti panunot lalo no sumken tay agpampammarang nga inspirasion.

narigat ngamin nga arikapen ti lagip no naglansaden iti lipat uray man no patigmaanan ti bagi nga agedadmedia.