Nga imbati kadagiti rekkang ti sarsaritaan
Iti rakrak a pader ni ayat iti sabangan
Iti ili ti Istanbul kas arayat ti anniniwan
Iti imperio dagiti maipatli a lemmat' ladawan
Iti isip kas iti pammati iti kakaisuna a salakan
Bulan ti bilangem tapno masangom a sublian
Dagitoy a linabag ti ipapanaw nga id-idian
Mangbugbunggaria ngamin ti al-alia
Ti panagsubli no ti rikna ket agtukiad
Nga umagep manen iti siudad a naggapuan
No ti aniwaas ti pinanawan ken agpagunggan
Iti daton nga atang, sangatukel a niniogan
Mama, gawed, bua ken namnama' panaglak-am
Basbas madagullitto manen ti panagsubli
Tapno mabuya ilelennek ti init sabali nga ili
Iti Baybay ti Maramara nga iti kalinakan a rabii
Ket ti panangnanam tilapia, naorasionan a kaasi
Ken ti panagsala ti anniniwan dagiti igos
Wenno ti panagballa dagiti alluyo ti Dios
Nga agragut nga agpasaklot a kanayon kenka
Agpasalakan kadagiti nakail-Ilokano a sirmata
Tapno kadagiti estoria sadiay nga isurat
Ikur-it iti agnanayon a panangigaygayat
Lagip lat' adda iti ul-ulila nga idda
Iti mail-ila a supot pungan ken lua
Iti lino nga ules, sumarot iti selula ti limdo
Ti kinaagmaymaysa kadagiti siudad a di ammo
A papanan ken panawan ken lipaten:
Dinton ammo no kaano a masublian manen
Pagpagen ti tapok, kuna ti mangaskasaba.
Kasta ngarud ti aramiden: ayaban ti nagan, ala,
"Umaykan, talanggutang, umaykan
Dika agbabati iti naisiasi a dalan
Umaykan, umaykan, talanggutang
Isublim ti kararuam nga agkatangkatang!"
Sumrekta iti wangawangan ti Ataturk.
Sadiay a kabinnalubal dagiti rikna nga umasuk
Dagiti buya nga itugot iti Ilokano nga alintatao
Tapno kadagiti rabii a ti ridep Honolulu agabuyo
Sublian dagiti sagrado a segundo nga impapas
Kadagiti rakrak a simbaan, iti nalanay nga anasaas
Ti ulimek kadagiti duogan a dalan ti dangadang
Nga agtunda iti adayo unay a pagkararagan
Kadagiti amin a nalamiis a rebulto a nagdawatan
Iti amin a kita ti kaasi a di ammo no nasantuan
Dagiti nabiag a sao iti ikur-it kuadernom
Nga itan ket nabiag met a rurog ti ulom
Ti testigo kadagitoy, kas napasnek a mamalaybalay
A pannakitinnawar iti Merkado ti Asia nga agiray
Sukotsukot a pakasaritaan amin dagitoy
Kari a tulag iti panagsawar ti dalluyon ken apuy
Ti Kristiano nga ari dagiti panagsakop
Aginnga iti maraumel a panagsaksi ti ayup
Dagiti malmalday a minaret iti kalbo a turod
Kadagiti bakrang dagiti bambantay ti daan nga ulbod
A kadagiti naangep a baybay nga nasanting nga agwanwanawan
Iti kada pumanaw wenno sumangpet iti Black Sea a kamang
Tumakdang iti kapanagan ti mangliwengweng a taaw
Dagiti tagainep dagiti kailian, isuda nga agtalappuagaw
Tapno umasideg ni gasat, aglakak-am iti limdo
Tapno ti ili a pinanawan ket koma agragsak a piho
Iturtured ti amin, agraman ti maudi a buteng
Anansata ania ti sublian kadagiti dayyeng
Wenno kadagiti kinelleng a ti baniaga nga alimbubuyog
Ket kukua ti di natakneng a pangamaen a bulastog
Ti gamrud a panginaen nga iti magabay nga aldaw
Agdawat iti kaasi kadagiti dapan ti parparawpar
Umagek kadagiti ramay ti padi a mannanao
A kadagiti balay iti Ankara makibalubal iti sao
Iti sao kas iti bugkaw wenno panagmandi
Wenno agsagrap iti kaasi dagiti mangngaasi
Mano a mansion iti nagaburan nga Istanbul
Ti mangitalimeng kadagiti parikut ti sang-ul
Kas kadagiti sekreto dagiti latigo ken ranggas
Ken pammadso iti nagan ti apo a kuripaspas,
Manangngaasi kadagiti pinarsua, kunaen
Kadagiti namaris a tulip, sa kadagiti adipen
Dagiti obispo ken muezzin a kadagiti agsipnget
Ket ti di masaanan a naleddaang a pinninget?
Halic University, Istanbul, Turkey
Abril 2008
No comments:
Post a Comment