“He could not explain it all in just one sitting. He thought he needed to explain it in a way our son can take … as to why he is still locked up and why he is enduring life in detention,” Myla, Cabochan’s wife, said in an interview with the Inquirer, in L. Uy, "Magdalo soldier explains cause to son", Inquirer, Dec. 24, 2008
Kasano nga usigem
ti dangadang
babaen ti jurado
dagiti agparsiak
a katay no ti ulbod
ket saan nga iti libro
nga agindeg
no di ket kadagiti paulo
ti damag iti agpatnag
a panagbuniag
iti batibat?
Alusiisen la ketdi ti rikna
a kastoy kas iti rikna
a nagal-alusan
ti nangabaruanan nga ayat.
Basaek ti umuna a panid
ti palawag ket agtundaak
iti innem a tawen
a panagsapsapul ti ubing
iti ama iti kaadalman
ti lenned nga agpatnag.
Mababalawko kadi
ti ubing nga iti saklot
nagar-arapaap iti kabakabalio
wenno mapanen
wenno pannakaiwallages
iti angin tapno kalpasanna
ket sippawen nga idaton
iti daga dagiti gubatgubat
nga ay-ayam ti ubing?
Awan sulnit a sirmata
kadagitoy a nagkurangan.
Kasano nga ibagam
iti putot nga adda
dagiti sabali a putot
kadagiti gumawgawawa
a sellang: dagiti alipato,
kas pagarigan nga agnagan
iti demokrasia a di met
karuprupa dagiti mailasin
a kaibaan?
Kasano nga ipanmo
a kas muhon ti nagkurangan
ti nagtakderan dagiti adigi
ti balay ti ili a no awagam
ket wayawaya
no ti biroken ti ubing
ket ti ullaw a marismarisan,
patayyekenna daytoy a
sirerennek iti taltalon ti Bicutan
iti sango dagiti karsel
iti labes dagiti waya a siitsiitan
tapno iti asul a law-ang
dagiti naparagsit nga ulep
nga iti narayray nga init
agsalakan, sadiay, sadiay
a mapnek iti buya
ti mapuruto nga agila
a ti ipusna ket superman?
Itedmo ti libro
a kadagiti rabii a maktang
ti isip ket inkur-it
iti nalamiis a pagunnatan.
Dagiti balikas daytoy
ket impusuak ti bulkan
iti barukong, ammok,
paggaammok unay.
Ngem dika koma
dumdumlao, lakayko
a gerero iti sumuno
a maduktalam: addanto
dagiti agkakabsat nga ulimek
iti nagbaetan.
Ngem ditanto a mangrugi
ti sao a saan a sinsinan.
Nangina ti sao
iti bibig ti putot
ti nakawayawaya a pagilian.
A. Solver Agcaoili
Hon, HI/Dec. 27/08
No comments:
Post a Comment