MANILA, Philippines—Former president Joseph Estrada played the belated Santa Saturday and visited poor communities in the villages of Payatas and North Triangle in Quezon City to give out groceries to residents. Estrada arrived at a covered court in Payatas to the cheers of the residents at around 9 a.m. "My New Year's resolution is to continue going around and help in whatever way I could for our people," he told reporters on Saturday morning. J. M. Aurelio, "Estrada plays Santa...belatedly," Inquirer, 12-27-08
Ti bay-ong ti Santa
ti engkanto dagiti agkutkutim
iti lua. Ditoy dagiti sanselmo
a kaarngit' malamut,
uray sangapirgis laeng nga ayat
uray manteka nga agpagdilakot
la ket ta malanitan ti bibig
la ket ta malagipda pay laeng
ti dalan ti patiray-ok.
Murkat a kuna
saan laeng nga iti lukong ti dakulap
ti agmirmiraut a Payatas
ti pakasarakan
no di ket iti nalawa nga iiseman
ti presidente ti datdatlag a salakan
iti man pelikula wenno iti Malakaniang.
Adda dagiti al-alawen a panggep
iti dua a kilo a bagas
nga asmangan ti maysa a kilo nga asukar
daytay napudaw kas iti bagas
ti dua a lata ti babassit a sardinas
a no paglangoyen iti digo ken kamotig
ket malmes ti baybay.
Umanayen nga arub-oben
pangep-ep iti bisin nga am-ammo unay
sipud pay idi iwaragawagda
ti maipapan iti gimong a baro
a gimong dagiti katan-okan iti pamuspusan
no kasano a ray-awen ti agulser
babaen iti katawa wenno diskurso
iti maibay-ong a masakbayan
dagiti sardinas wenno bagas
dagiti asukar wenno sabali manen
a panagaradas dagiti masanting a naranggas
isuda a mangisierto a kukuada
ti umuna a magao a di masinunuo no naluyak
isuda met laeng dagiti agarrap
nga pagpangkisen ti pirak
dagiti agdiwig ta ingget durbab.
Ti bay-ong a sagut ti presidente
a pinadisi dagiti iriagtayo iti Jericho March
kas iti maikadua a panagpatalakias
kadagiti amin nga arsab
iti man nagan ti sagut ti Santa
iti man nagan dagiti agdakiwas
iti bulsa kas iti baul, isuda a rapas
tapno agikari kadagiti kaasi
ti sansanuong a sardinas,
ti agbanbaningrot a bagas,
ti sabali manen a panagarsab.
Ita, laksiden ti diar ti patiray-ok
a kas atang kadagiti agbugsot:
iti Payatas ket ti pulso
ti pagilian nga agbotos,
mangipatakder manen iti bannuar
a bogus iti pedestal ti asi a maibus.
Ingget nakem ketdi dagiti kapada
nga iti bay-ong laeng ket ti anges
isalda: ti nakurapay ti kasinnala
ti baknang nga agpagungga.
A. Solver Agcaoili
Hon, HI/Dec 27/08
No comments:
Post a Comment