Bilangem dagiti umuna
nga ulimek
dumadangadang iti ili.
Kadagiti umel a darikmat
ti nakain-inaka a kasasaad
dita a taladuen
ti librom dagiti ay-ayam
dagiti di-matay a lungat:
saanda nga ikankano
ti karselmo
a narehasan iti ibit
dagiti makaammo iti ulimek
dagiti tanem nga idi pay
iti panawen ti kriminal a panglakayen
a di naggandat a pumusay
kadagiti arpad dagiti rebelde a bituen.
Innem a tawen a kaawan iti sibay
iti ubing nga iti agarog a rabii
ket kadagiti sellang agpasiken
santo imputot kas iti tagtagainepen
anian!
innem a tawen
umel a kaayan-ayat
iti daytoy a basingkawel:
sika, gerero, iti ina a daga nakayakan
dagiti nasudi a panunot
a kadagiti aldawmo ket inka binilang
a kadagiti ngudo ti paltog ket ti anikki
dagiti makipagili nga agnagan iti babawi
awan man laeng pagpatinggaanan
dagitoy a kalak-aman
ket ita, riknaem
ti bagsol iti barukong
ti dunggiar
ti nagtengnga nga ulimek
ti anak nga agtawid kadagiti pungtot!
Birokenna piman dagiti apungol
ti ama, ti tapik iti abaga
nga iti pupokan addaka.
Ti panangikulpi, kas pagarigan
iti papel de japon tapno iti imatang
ket ti pangiluganan dagiti kansion
rebolusion, idanonda kadagiti lenglengleng
kadagiti mannalon
a kadagiti tuod agparintumeng
kadagiti patron nga agpakaasi
iti maikadua nga ayat
sabali manen a pangiyablat
iti kitingkiting, ti apomi a kitingkiting
ti lalaki a nasanting
a mangan uray awan saing
ti kararag tapno di tumangad
iti barsanga dagiti bengkag.
Itedmo ti libro:
basaento dagiti agbilang
nga agpullo.
A Solver Agcaoili
Hon, HI/Dec 26/08
No comments:
Post a Comment