Peregrinasion Dagiti Bulbullagaw

Clowns make a pilgrimage to a Mexican basilica, in Guadalupe. They will pray for success for the coming year. Sourced from Fox News, Dec. 18, 2008.

no apay a kadagiti bulbullagaw
a makita ti kasasaad ket maysa
a datdatlag a pasamak 
kadagiti amin a mangsursurnad
iti gasat a kas kenka. 

awan kuskos-balungos,
sika ket bulbullagaw:
agdadata, agpakpakleb,
agam-amangaw
iti palso nga araraw
iti pudno a tabbaaw.

ania ngarud, ania ngarud
no di ket lagipen dagiti katawa
iti laksid ti panangtiltilmon iti lua
bay-an daytoy a maigamer manen
iti rusok santo iti dara
a mapan kadagiti gurong
tapno adda pia ken kired
iti panagparintumeng iti baldosa
bay-an a kadagiti saka ti Virgen
a manangngaasi kadagiti madin makarikna
ket malayus dagiti tapok ken anged ken duggong
kumamang daytoy iti kuelio ti bulbullagaw a sika
sa iti karabukob, sa iti agpipikel a patong.
namak pay dagitoy a reliko ti panagimbag
iti sansanuong.

bulbullagaw a makuna:
napanka iti sabali
nga ili iti kapegges ti kalgaw.

iti los angeles a nadanonmo
ti kayat a sawen ti nasapa a panagrurusing
a dagiti sabong ket kaibatogan
ti pannakapaay. 

wenno ti arinsaed
dagiti maipenpen a panagbabawi
iti yaay tapnon din panunoten
ti panagsubli pay. 

ta kas iti gabat
a sibibiag, agruting ti rikna
uray kadagiti nalamiis a tarigagay
iti man kinelleng a pakapilawan
wenno iti uma ti pangabaruana
sisasagaka man wenno pimpiman.

kaputednaka kadi dagiti unas
mapungo a mayuper iti danum
a kas kadagiti immuna a nakigasanggasat
balo ti unas a maus-os
tapno kadagiti di maungpot 
a pagibaluan kadagiti nabiag
a darikmat ket dita nga agramut
dagiti agragut a namnama
nga iti ili ket di nananam
saan a nabirokan uray koma no naminsan?

kas kadagiti bulbullagaw,
sumuknalka iti Virgen Milagrosa
pumarintumengka kadagiti anghel
iti templo kardinal a Mahoney a kuna ti kontra
ket peke nga adipen ni ayat
iti katedral dagiti migrante a pammakawan
nga itantanamitimmo nga adda koma
iti aglamlammiis nga imam.

basatem ngamin dagiti agpigpigerger
a waig ti kinaawanan-sierto dagiti maipasngay
nga aldaw,

kas iti insegida lattan a panagsipnget
ti aglawlaw tapno iti panagaliwaksay koma ti isip
iti sardam

ket mapidot ti Virgen ti Guadalupe
nga ammom ket kaduam iti panagam-amangaw
dagiti agexilo a bulbullagaw.

iti lawag ti poste ti Normadie iti nagsapalan 
ti Gardena dagiti inauna nga addang,
sirigem ti isem ti ina ti grasia
a ti likod ti istampita ket ti dalan
nga agturong iti darundon a pagkibaltangan.

dika mamati kadagiti patigmaan:
isabukelmo ti Virgen,
idulin nga ilalaen iti pungan
uray iti isasangpet ti nagabay a kalgaw
santo ti nasapa a panagrururos
a kadagiti ramay ket ti maibusen
a panawen ti binubulbullagaw nga ipapanaw.

agpangem ti nawatiwat a distansia
ti lawag ken ti makuartokuarto
a pagiladan. 

iti uluanan ket ti dalan
dagiti eroplano iti LAX a kadagiti rabii
nga alaennaka ti bileg ti ila
ket agparadada a kas bulbullagaw
iti mabibbibi a law-ang.

pamrayam a bilangen dagiti pumanaw
dagiti sumangpet samonto kariten 
ti awan patinggana a langit 
iti baet dagiti ibitmo nga awanan lua
awanan saibbek
tapno kadagiti estasion ti panagsagaba
kas kadagiti bulbullagaw
ket matdaka nga agar-arapaap:
sapay, sapay, sapay
koma, koma, koma,
sapay, sapay, sapay,
koma, koma, koma.

Hon, HI
Dec. 19/2008



No comments: