Daton iti anak, 2

“I believe every father would like to be a hero to his son. It was once my dream. Now, I had to let go of that dream, for I wish I could be someone better,” former Navy Lt. Manuel Cabochan wrote in his book. J. Uy, "Magdalo solder explains cause to son," Inquirer, 12/24/08


Iti isip dagiti manakem 

ti rugi ti kappia a rugi 

met laeng dagiti sanaang,

gerero ti ili ken sirmatami.


Saan a kadagiti kari 

nga aggubuay iti bibig ti ari 

wenno iti pus-ong ti aribai 

wenno iti mangtagtagikua 

iti pulbura a pangipatli

kadagiti sansaning-i.


Naridam dagiti murmuray

kadagiti agkabannuag a rugso

nga ikot ti parmata, iti isipmo

kas iti imeng ti nalamiis a selda.


Rehas a landok ti bilangem

kadagiti paskua, iti man

pannakaiyanak wenno

iti panagungar.


Ditanto met laeng, 

iti naulpit a pannusa ti uppat

a diding

iti makaalino a pannakaigirad

ti ngipen iti pingping ti rabiim:

ditanto met laeng ti sariugma 

ti sipnget iti lawag 

dagiti maudatal a panunot 

a kadagiti umili nga agpaarayat,

rayray ti lawag iti nasipnget 

a mutektek ti bannuar nga adi a sika

ta sika, iti soltero a saliwanwan

dagiti nakapupok a nakem,

sika ti pamkuatan ti pasublien

a pagilian ti pusotayo nga umis-isem. 


Itedmo ti libro iti anak

nga itan ket anak ti ili.


Dimo lagidawen ti dina 

pannakaawat iti kasasaad

ti pananghusgana kenka

a saanka a superman nga ama:

kenka dagiti sibibiag a rason

no apay a ti init ket agsapul 

iti bannawag.


Yawatmo ti libro dagiti tagainep

nga idatonmo kenkuana

nga idatonmo met laeng

para kadagiti amin nga annak.


Iti bartolina dagiti mapuyat

a ridep, iti aglatlati a kandado

ti pupokan dagiti gera a pudno

sadiayto a makita ti anak

ti anag ti pannakigasanggasat.


A. Solver Agcaoili

Hon, HI/Dec 26/08 

 



No comments: