Loteria ti Gasat idiay Roma, 2

Napadasakon ti amin 
a pannakigasanggasat nga imbakbaklay,
iti maminimini a numero kas kadagiti papel ti bangko
a no birngasanda ken yapyap.

Kadagiti agresesion a lukong ti dakulap,
kas iti inggurgurigor a darepdep 
ti lawwalawwa nga iti tawa ket lumaem
santo kadagiti labes ti kanser
ket sadiay nga ipakni ti itlog ni gasat
nga awit-awit iti binigat. 

Kasta, kasta ti gagem
nga intugotko iti Roma, ket ita,
iti daytoy nga aldaw a panagtennag 
ti managsapsapa a nieve,
itayak dagiti dakulap tapno kadagiti lukong
ket matalado ti numero a sukat
ti parintuod wenno kalio ti tumeng. 

Maysa a Noviembre
ita nga agsipungtuan iti Disiembre
iti nalamiis a pangkuyegyeg ti makalamri
nga ules wenno panagbettak ti tropikal a bibig
kas iti Ilokano a piditpidit ken mannalon a ramay
uray no bungonen ti kararua ken lulonan
iti seda a balabal nga isakibot ti agpatnag. 

Manipud iti turod nga agdudungsa,
sumalogak iti Vaticano iti labes
dagiti kumarkarappet a pino
ket sadiay,

iti arrap a lawag ti kandela 
a nakalipaten iti kayat a sawen
ti pannakaiddep, 
iti maysa santo, 
itanamitimko amin a kita 
ti panangabak iti lotto: 

superlotto iti Lunes, Martes, Mierkoles 
megalotto iti aldaw ti Viernes ti arsagid a santa
lutong-makaw iti amin nga aldaw iti pagilian
dagiti arsab ken darukadok ken karuprupada

iti man Manila, iti Filipinas a kain-innala,
a nairanta a pagbakasionan dagiti rikna

iti man Los Angeles a pagallaallaan
ti natiweng a gasat dagiti agkalimduosan
uray no ti lamiis ket agpermanente a residente
iti sellang

iti man Honolulu a pagbilangan
kadagiti Paskua a panagmaymaysa, 
kadua dagiti ladawan ti bantay 
a tagtagikukuaen ti nailet a tawa manipud 
iti agmalem a panangtugtugaw
kadagiti makikamkamalala 
a makaallilaw a burburtia
ti masunotsunotan nga ipapanaw.

Ipempenko iti maleta
dagiti edad-media a sirmata
no ania a numero ti ipatpatigmaan
ni San Camilo a ti pusona ket pasas
a kirriit a  mangga iti babaen ti binulod nga idda.

Ditoy, iti kuerpo dagiti agpaspasiar 
a gasat, iti di makaidna a rabii ditoy nga ili
dagiti santo a natay ken sibibiag
dagiti agngangabit a ragsak, iti buya
dagiti agarog nga agayan-ayat iti Fontana de Trevi
a sadiay ket kalinnantipda ti publiko 
nga agbuybuya kadagiti de-kolor a danum
a maipusuak ken ti sinnanggol 
dagiti manglimlimo a panagdawat 
iti kappia iti patron a San Francisco 
a ti kararag
ket ti kinakurapay ti puso
ti husto nga agay-ayat,
riendaen dagiti gumarut a saludsod
no apay nga adu dagiti daksanggasat
a kas kaniak iti laksid dagiti amin 
nga ipaparintumeng ken isusuknal
iti laksid dagiti nasagraduan nga ar-araraw
iti man kaltaang ti sango ti simbaan ti Roma
wenno iti katedral ti panagam-amangaw.

Kas iti bimmisita, rekpan ti maleta
tapno sadiay ket idulin dagiti yawid
a rikna: 

nalaus a panagbalaw, kunak koma,
iti panangadak manen iti nakaitaoan
ngem ta sumabat met a sumarabo
dagiti pangngadua iti panagsubli a pimpiman.

Panawak ti Roma
ngem ibatik dagiti tagainep
kadagiti rekkang ti baed a  katedral
ni ayat a mangal-allilaw.
Napipianto a surnadan, kunak iti bagik
a panglinglingay, surnadan iti lagip
ken suknalan ti baro bagi, iti panawen
a madanonan, no madanonan pay. 

Ti ngayed ti siudad
ti diak pakaidnaan: kuriruenna 
ti agsegsegga a panunot kas iti imatang
ta dagiti diamante a daradara
kadagiti korona ti adu a Virgen Maria
kadagiti altar a mayatang ti indulhensia.

Aeropuerto Fumiggiano
Roma, Nov-Dis 1998/
rev Dis 17/08/Honolulu, HI
 

No comments: