Panagibaratilio iti Maladaga

MANILA, Philippines — The Department of Social Welfare and Development (DSWD) on Wednesday condemned the reported sale of babies found in the house of a former town mayor in Rizal province, outside Manila. Inquirer, Dec. 18, 2008


Damag daytoy a kapitulo ti nakain-inaka 
sarita a naggibus baratilio dagiti maladaga:
idi kas ita, sika ken ti sabali nga ubing
mailako a matawaran napintas a talugading  

Talugading a siklo dagiti inosente a garikgik
ken pannakaguped panagdawat iti sanaltek
panagkari kadagiti  pattapatta iti pudno kontra ti ulbod
pananglaga kadagiti pateg ken sayaat, ay agpasugnod,
ibaratilio met ti ili dagiti un-unnoy ti kabsat
a naisangrat kadagiti ubbing nga awanan gasat

awanan gasat, isuda a linglingay koma
kadagiti wingwingiwing iti maladaga
dagiti mangpasangbay iti sariugma a linnaing: 
anak para kadagiti lupes nga awanan bain
iti sabali nga ili, kaniak ti panagkin-od
kenka iti panagtagibi a panagpasugnod

a panagpasugnod iti pannagibi 
ti trahedia ti mabakante a dagidagi
a, ta, ngamin iti daytoy a kapay-an
uray ti kadkadua ket aramidendan
a pagkamatan a mangispal sanaang  
pagpuonan a pangrugian kibaltang
iti panagtagilako iti apros a kilabban
kadagiti isem a bangbangir iti dalikan
pannakapnek a kas iti awis ti lunglungan
ti sagubanit ti utek a mabisin laaw
ti an-anayen ti lilidduokan a mawaw
lak-amen ti timek nga agpaparaw
nanamen lasag nga agam-amangaw.

Agam-amangaw ta kastoy ngarud saritaan
iti daytoy nga ili a ti panaguttong panggedan
kukuakon ti ribo a panagkin-od iti balitang
agapura nga agaramid iti ubing iti saklang 
tapno adut' mailako a masanting nga ubing
kukuan ti merkader ti panagtagibi aleng-aleng
daytoy baro a testamento, ruk-at lusngi ti lalaki
daytoy daan a testamento, wayawaya ti babai.

Wayawaya ti babai a ruk-at lusngi 
daytoy a tulagan dagiti malalaki
ta siak a mismo ti kin-od ili a pakpakawan 
ket sika a mismo ti lupes a kaikarian. 

Kaikarian dinto agadu a pangganakan
Kukua ti ili, kas amin a lupes a saritaan
dinto kaano man mangrikna iti pus-ong 
dinto daytoy agpanaas nga agmauyong.

Agmauyong ti Jalajala iti panagibaratilio:
maladaga ti kasukat ti de-papel a sangaribo
sandi ti madagullit a panaguttog ti lateg a melmel
makisinniping iti magatadan a latilati a nikel.

Latilati a nikel ti adda iti likod ti damag
kastoy ti mensahe ti agdadata a maag
Agpeggad dagiti Jesus, Jose, ken Maria
Ub-ubbing nga iti nagan ket presiot' maysa

Maimaro kas iti naganus unay a barukong: 
panagpagungga dagitoy ti ili a barrairong. 


A Solver Agcaoili
Hon, HI/Dec 17/08


No comments: