Krus a Katay iti Muging, 2

Lukagennaka ti lamiis, 
kas ti salemsem iti panagngangabit 
ti nabati pay a kinatured.

Kampay-idi ti darepdep 
a makasapul iti kasamayan a sukal:

Baro a katay nga agtaud 
iti bileg ti ina, 
likido ti salamangkana
manipud iti selula ti pammati 
a kadagiti impasngay a dungngo
ket riingen ti krus ti inanama. 

Tallo a krus, kunaem iti agtagibalay
mamintallo a sukotsukot a katay a krus
a mangbuggiaw kadagiti am-amangaw 
kadagiti mangmangkik iti adayo a rabii

ti nagtagtagainep a sika
iti adayo a rabii iti asideg 
dagiti batibat ni malmalanga
a dagiti annak iti tagainep gumawgawawa

isuda iti wangawangan 
ti mangig-igup a bariwangwang
ti pannakaipatli iti masakbayan.

Bumaringkuaska a makirinnupak
iti buteng: iti nasaknap a sipnget
iti umuna nga oras ti bigat a naridam

alawem sadiay ti kararag
nga itanamitim ti nabati a tured

umuna iti panangpagtakkub 
kadagiti agpipikel nga ima
aramid a nasursuro iti kumbento
a nakadulin itan kadagiti nabayagen a tawen
ngem ti panagpilko dagiti tumeng
ti di kaano man matallikudan
uray no ti duri ket sumuko
iti bannog kadagiti masukonsukot a kalman
a ti talinaay ti isip ket manglanglangan. 

Mulenglengam ti pagorasan
a mangirakrakurak iti panagbalaw
dagiti estranghero a rikna ti immadayo nga ama
uray no ipatulodmo dagiti kararag
kadagiti angin a bumanesbes iti Honolulu
tapno koma sumalpot iti sabangan
ti narayray nga agsapa iti Manila.

Kalkulaem dagiti agsapa iti pagilian
a pinanawan, agur-uray 
a kankanayon iti sukal a kas
met iti sangkagimongan a salakan:

maysa pay a ridep, 
maysa pay a lidok, 
maysa pay a tanamitim
iti o apomi a kitingkiting
o krus, o krus nga agbibitin!

Maysa pay nga anus, agur-uray
agpalpalimos: 

iti idda kas iti panagpattapatta
iti kari ti agnanayon santo ti panagawag
tapno agpangen ti pito-a-ribu a milia
a distansia ti krus a katay ti muging,
mamitlo nga aramiden kas idawat
ritual nga aramiden ti kapisi ni ayat
kadagiti ubbing nga ingget komat' gasat.

A Solver Agcaoili
Hon, HI/Dis 21/08



No comments: