Daton iti anak, 3

“I no longer would like to be the hero whom my son will only talk about. I dream to be the father whom my son will be so much willing to talk and be with,” wrote former Navy Lt. Manuel Cabochan in "A Father's Confession--Chronicles of a Rebel Soldier" in L. Uy, "Magdalo soldier explains cause to son", Inquirer, Dec. 24, 2008


Dagiti dadduma 

a sao

tagilako a maibaratilio 

iti tiendaan

dagiti nalaka 

a kassaba.


Uray no siasinno 

makairakurak kenka, anak,

iti dara-ken-lasag 

a tagainep ti natured

a mannakigubat nga atapek

a kas koma kaniak

no daytoy a birngas

para kaniak.

 

Agubbog daytoy a rikna

iti gerero ni liday

ngem saan iti babawi,

tumrarong kenkuana

ti maris ti pannakiranget, 

ti balabala ti sao

ti rinnupak iti nagan 

ti linteg iti ar-arapaapen 

a bullalayaw nga ipupokko 

iti aldaw

iti nagan ti kari 

ken ti panagitungpal. 


Adu a saludsod, 

gerero nga ubing,

ti pamkuatantayo 

a sumuko 

iti anniniwan

dagiti salaysay 

a kadagiti rabii 

agdeklarada

iti ipupusay 

tapno kadagiti oras 

ti inana

maipatarus 

ti pateg 

ti inauna a paripirip

a maipasngay.


Sika, dayta, 

sika nga anak

ti panaglangan

kadagiti kanito

nga aw-awagam

dagiti talinaay iti takiag.


Sika ti putot

dagitoy mannakidangadang

a gandat

iti dalan dagiti kanion

iti anggulo dagiti bala

iti kanalbuong ti sao

a makiranget iti nagpanes

nga agpatnag

a sika, sika, anak

ken dagiti amin nga annak

sika, dakayo, ti anting-anting

nga aw-awagak

iti ungto ti mammapatay

a paltog a ti rapiki daytoy

ket ti mamagkappia a gubat

iti panangkautibo

kadagiti rikna a nadagsen unay

matalek a saranay dagiti ribo

nga ipupusay

a ngem ta

mabati nga agpaspasugnod

dayta a rikna

a ngem ta ti libro

ket testamento ti iyuungar.


Awan dagitoy mannakigubat

a rikna kadagiti dulang

a ti napudot a kape

ti maikanaw iti sartin

iti kinirog a bagas a baak

a kadagiti ima 

dagiti mannalon nabasbasan.

Mailaok a maipaburek 

santo mailaok 

iti balikutsa 

ti pinasam-it

a panagraman

iti maparbangonan

a dengngep ti tian.


Ammok dayta a rikna:

iti libro a mapudno 

iti agnanayon: anaknak

met idi dagiti manugsugat

a kampilan, buneng, badang.


Ngem dinak pinanawan

ti amak, wenno di naipupok

iti sardam ti panangipinget

iti imbag, 

sayaat, 

pudno

iti man mabisbisinan

a pinggan 

iti man sakmol

a mail-ila 

a mangan.


Daytoy, ammok, 

ti pagpulkokan ti utek,

kadagitoy a buya:

kasano ngamin 

nga agpangen

ti nawasnay 

a timek 

ti panangipeksa 

iti ayat

iti maturturtor nga ili 

kas iti makipagili a mapadso

nga iti sappuyot 

ti managbasol a langit

iti suli ti karsel nga agkapuyo

ket sadiay ti indulhensia

a kadagiti sarita 

ket agtagilanga a rurog

dagiti di yebkas 

a kapessat ti panaas? 


Siak ti amam.


Ngem amanaka met

laeng dagiti paidam.


Masursuromto met laeng

ti dangadang a kenka

naitani, kenka 

a nailatang.


Kunaemto kaniak:

sagutakto met ti anak

ti libro ni karayo

kas iti lagip

a kaniak impasagrap

iti laksid ti kaawan

kadagiti oras a ti ama

ti aw-awagak.


A. Solver Agcaoili

Hon, HI/Dec. 27/08


No comments: