Murkat para iti marigrigat

GENERAL SANTOS CITY, Philippines — The rich and the poor, the celebrated and the unknown had one thing in mind: to feast with their hero and world boxing’s latest sensation Manny Pacquiao, on his 30th birthday Wednesday. But the class divide was ever-present — the glitz and glitter of Las Vegas for the VIPs at the KCC Mall convention center and the simple food handouts for the less fortunate at the Oval Plaza grandstand 1.5 kilometers away. A. Zonio, DJ Santos, TJ Burgonio, Inquirer, 12/18/08


Ipatomi dagiti amin a maipato ngem saan a kastoy

ti diar ti kaasi, Pacquiao a koma sanggirmi. 


Ania a langa ti padaya a ti murkat ti kastoy

a simmangbay iti kalsada a kenka agur-uray?


Dakami dagitoy ken ti sipsipat, panagdayaw

Insangpetmo a gapu ti pasindayag.


Yalnagmo ti padaya ket dagiti makasapul iti sustansia 

addada kadagiti lenglengleng, didaka masirpat


idinto ta dagiti barrairong a rapas  

ti presidente dagiti kumbawa, kas pagarigan


ken asawa dagiti sangapangen a mannanakaw

addada kenka, manglamlamiong iti arpad


isuda a miron ken aminen a usisero 

a kalanglanga dagiti kabron


ket iti milion a malamut ti yan ti atension? 

Namak pay dagitoy nga arsab


a no pakanem ida ket kaduaam iti garakgak

samonto pagsinam-iten iti ragragsak.


Iti sabali a bangir, dagiti makiranud a ti katay 

ket aglayus mapan kadagiti baybay ti lua


agayus kadagiti kanal a nabungtot santo kumamang

kadagiti waig a nabuyok iti GenSan a subsublian


nga idiay ket dagiti dapan ken nakirinnupak

iti kinapimpiman? Mano a milion, mano a siim,


mano a panagapas, Pacquiao, ti inrugi

dagiti letson a dagiti laeng abuyot ti makaagsaw?


Dimi maipinta ti kastoy a pabuya ti kinalabon,

ti agdadata a panaggudua dagiti maton


ken dagiti agmirmiraut a malukong. 

Sangatukel a sangadilakot a sangagemgem


a pansit ken innapuy nga ilaok iti lamlamiong

nayonan ti ayatmi kenka, palakpak dagiti mannibrong


ket ti kararag nga iti maysa nga aldaw

kalanglangdaka a saan a ti styrofoam.


Pacquiao a pagtamdan, napanam

kadagiti kalgaw dagiti gawat iti GenSan?


Pacquiao a bannuar, nalipatam kadin

ti insalikadmo a gayuma ti panagrambak?


Di kadi ta kada basnotmo ket addakami

dakami a marigrigat, kaduanakam iti Las Vegas


iti makaay-ayo a kararag panagsayaat?

Daytoy a murkat para iti marigrigat


ti mangal-ay iti ayat, Pacquiao a salakan

kadagiti didigra dagiti mangyaw-awan.


Ala, ngem mag-an kadi ti bibig a malanitan

napipia laeng a liwliwami a manglanglangan?


A Solver Agcaoili

Honolulu, HI/Dec 17/08




No comments: