Chacharatsa Para iti Ili

“Putang ina! ... Patayin ang Gloria-forever Cha-cha na ito!" Senador Mar Roxas, iti rali iti Makati, Disiembre 12, 2008, Inquirer, Dec. 13, 2008

Kastoy ti agsala iti cha-cha, kabsat:
Iwidawid dagiti ima a paragammat

Santo isabukel dagiti rapas a dakulap
Iti nauneg a kaban dagiti pada nga arrap.

Idinto nga ar-aramiden amin dagitoy,
Ummongen aso a karuprupat' baboy

Bilinem dagitoy kas uken ti ili
Ikkan iti taldeng kas saluad supadi.

Titit para kadagiti senador a gamrud
Sutsot kadagiti diputado nga ulbod

Dorobo kadagiti amin a buyot 
Siiigam man wenno sitatakrot.

Agkalawikiw uk-uken, sungoda iti dapan,
Lak-amen buyok ti amo a di mangiramraman.

Daytoy a buyok ti bangbanglo ti aribai
A darukadok, nga iti rali di makangirsi.

Kasla mira ngamin ken insenso ti padi
Ti angot iti asawa a pimpiman kaarngi 

Batido kadagiti amin a linalangsot
Dagiti teddek ti pagilian a baningrot

Naktisal-it a talaga ti kakastoy, 
No ti aribai ket isuna ipabus-oy:

'Nian ta namnama koma ti sangapagilian
Ngem ta dadaulo met dagiti garamugam.

Ugaw iti isakmol kas iti derrep nga itantan
Ta namak pay nga ibalin ti rikna nga awan

A ti pannangan mamitlo ket pananglangan
A ti pannakapnek ket panagbubussog lattan 

Kasano koma a mamati dagiti umili
Iti panggep no kinnusit ti aramid ti aribai

No dagiti tuta ket ukenda a pasalsali
Arrabis ti nasken wenno latigo ti pagi.

Baliwan amin a paglintegan a kas rumbeng
Ngem saan nga iramraman bukod a gagem

Bay-an a ti kaaduan ti manghusgat' aramiden
Ta pagimbagan nakurapay ti pudno ken nasken.  

Dis 12/08
Hon, HI
 

No comments: