dagiti garakgak nga iti buridek
a linia ti daan a daniw
ket ar-ariada iti napalabas
kas iti agdama nga umad-adayo
iti pannakalukag iti agpatnag.
Adu dagiti gandat
a para kadagiti annak
nga iti linabag dagiti daniw
sadiayda a mainaw iti balikas a makapaimbag,
mangpalaing kadagiti sadiwa a sugat
iti mabannog a panunot
kas iti makaal-aliwaksay a lasag.
Adu a saludsod ti maimassayag
iti nakamira a paraangan
dagiti pungdol ti madre-de-kakaw
maseggedan, kas iti makauram a paulo
nga agtunda iti pannakaeddep
ti nalabaga nga apuy nga aggargarakgak.
Dagitoy a panunot ti kaatag
iti rabii a kadua ti solitario a gasat:
iti naimeng nga ules ket ti alimbasagen
a kasasaad, iti pananglaglagip no kaanonto
ti aldaw nga agsubli ti panaglalanglang
dagiti garakgak dagiti annak
kadua dagiti ubing nga uni iti panagsubo
a panangnanam iti agas ti bannog
kadagiti taktakawen a darikmat.
Malukagka iti darepdep manipud iti pannakairidep
a di napakpakadaan, kas iti pannakayepyep
no dumteng dagiti agim-imon a rikna
kadagiti palad,
ti kanigid iti kari iti arte
ti kanawan iti dawat ti dulang
a no agbirok iti maisakmol
ket dina ammo ti mangliwat.
Iti Torrance nga immuna dayta a darepdep:
ti isisina dagiti gapu no apay a kadagiti sinurat
ket sadiay a biroken ti aglalayon koma a gasat
tapno matulongan ti pangngarig a mangsursurot
kadagiti amin a suraten iti nagan ti saem
sinurat a panangited iti dayaw ken liday
panagsuknal iti murmuray kas met iti sugel
dagiti agtutuglep a panagiyablat
kadagiti makaagas a katay,
pakrus a mamitlo iti muging
kadagiti tallo a paulo dagiti daniw
nga iti sellang ket nangrugi a nagirakurak
kadagiti nakain-inaka a kasasaad ni ayat.
Pakrus iti muging, mamitlo, kunaen
iti kasimpungalan dagiti amin nga an-anek-ek
iti man agsisipungtuan a banang-es
iti man aglalayon nga anangsab.
Sukal ti katay a maipakrus, mamitlo
iti rupa ti langit, mamitlo iti tanamitim
iti mangted lung-aw a naimbag a gasat
kontra kadagiti amin a dagensen
mangpalag-an iti im-imeten a daniw
iti umadani koman a sagrado a bannawag.
A Solver Agcaoili
Hon, HI/Dec 21/08
No comments:
Post a Comment