Patigmaan daytoy kenka:
agbabawika, kas kadagiti amin
a sutil iti daga.
Ibagam ti am-amangaw
a dispensar kas iti parparawpaw
a katawa, ubbaw nga aglansad
iti barukong ngem tumayok
nga agpaisalakan iti nakapresio
a tallaong.
Pangpullat kadi daytoy
kadagiti umuna nga ulimek
no agkikita dagiti nangat-attit
kadagiti makipagili a babassit?
Kasano, kunam, kasano
ti mangted iti sinsero a patiray-ok
iti babai a merkader iti buyok
a no agmaniobra iti dirangot
ket namak pay
a panagsay-op:
manipud iti altar
ti nangisit a madonna
agingga iti pasilio dagiti kama
ti matrimonio a di panagasawa
manipud iti naminaan
a hardin ti palasio
agingga kadagiti kukulay-ongan
ti balasador nga esposo?
Ibagam ti babawi
iti mannanakaw nga iti rehas
ket di pulos nakasursuro
iti panagbabawi.
Nalipatam kadin dagiti rabii ken aldaw
dagiti bigat ken agmatuon
dagiti linnaaw a kadagiti rusok
ken lulunan, sadiay, sadiayda a nagindeg
tapno laeng kadagiti kalsada
ket urayenmi ti ayuda ti darudar?
Nalipatam kadin dagiti kari
kadagiti dagiti kanion ken rosas ken rosario
ti eukaristia ti panangpisi iti tinapay
ken panangtilmon iti katay
tapno laeng mapasubli ti aaangsan
tapno maidir-imi dagiti sainnek
dagiti pimmusay tapno dakami
maisuratmi ti kayat a sawen
ti makipagrikna
a wagayway?
Saan ta awanka kadagiti butengmi.
Saan ta awanka kadagiti pannakigasanggasatmi.
Awanka
kadagiti kanito a ti laeng bendision
ti marka demonio
ti bubon dagiti regta:
ti panangiluges
ti anghel iti sairo
ti dapanmi kadagiti amin a suitik
ti dapanmi kadagit amin nga arsab
ti dapanmi kadagiti amin a balangkantis
ti imami kadagiti amin a mananggundaway:
iti rupa, iti teltel, iti pispis
ti imami kadagiti amin a mangikari
iti bannawag iti kaadalman ti rabii
a panagbilang iti sakosako a pirak
kasukat dagiti ibit dagiti annak
a no mammigat ket pangngaldaw
ti panangiyawatmi kenka
iti balitok a bandehado
ti bileg nga isu met laeng
a balitok a bandehado
ti panangisawangmo ita
iti dispensa.
Igawidmo koma ti dila, presidente
dagiti sanaang iti mabisbisinan nga aldawmi
a ngem ta nairteng dagiti pammabalaw
kadakami: saan a kardinal wenno obispo
ti mangmisa kadakami
no agipumponkami kadagiti bangkay
dagiti darepdep ti ili.
Intedmi ti dayaw iti babai
kas iti panangitedmi kenka:
awan dua a sao,
mayat ti papangresanmi.
Insaldami dagiti aldaw
kas iti kayaw ti buteng nga agampagaw
kadagiti kalapawmi
kadagiti dakulapmi a mawaw
iti bales ken sayaat ken dung-aw
iti lua kas iti napudot a tinapay.
Erap resign! Erap resign! kinunanami
Erap resign! Erap resign! inkararagmi
Erap resign! Erap resign! impakaasimi
iti senado dagiti dagensenmi
ngem sulpeng dagiti di manangngaasi.
Ania koma nga aramid
ti pangontrami iti witwit ti tamudom
sika a donia dagiti di mamingga
a pananglanglanggong
sika a donia dagiti dakulap nga agkapuyo
kas iti panagkalio ti utekmi?
Di masinunuo no sadinno a disso
ti nangibatiam iti asi kadakami.
Iti banarbar ti bosesmi ket ti panaganikki
iti palek ti batuta iti duri
iti biag a maidasay iti sango dagiti padi
iti narugit nga aripit dagiti pannakaipatli
iti maut-utoyanen a rangtay ti Chino Roces a saksi:
saksi dagiti amin a gulib
a ti naganda ket panagayat iti ili
dagiti amin a panagkurimes
kadagiti karimi iti agmamayo a dulang
a ti naganda ket panagayat iti ili
dagiti amin nga agbrakadabra
iti Malakaniang kadagiti disoras a panagabuso
a ti naganda ket panagayat iti ili.
Dinamagmo kadi, presidente dagiti amarilio
a gagem, dadaulo dagitoy a panagbabawi
dinamagmo kadi, dinamagmo kadi
no dagiti tamudo dagiti pagayam
mararaem iti ay-ayam dagiti buklaw
ket mangitudtudo iti tengngat' aldaw
mangisursuro iti panagangtab
tapno iti panagkuyakoy ket ti panagtig-ab?
Dinamagmo kadi
dinamagmo kadi, dinamagmo kadi
iti senado ti kinaawan linteg
iti konggreso ti panagkumaw
a kabuligna ti panagsursuro a panangkurikor
iti langilangit tapno masursurot' panagbakkuar
tapno manen, manen ken manen,
mangipauneg kadagiti linteg
kadagiti malamut a karbengan dagiti awanan
tapno manen ken manen
mariing ti aarriekan
marring dagiti selula ti kinaarsab
tapno sadiay, iti nakatanggaya a ngiwat
sadiay, sadiay
iti udina masursuro manen ti agbakkuar
tapno manen ken manen ken manen
masunotan ti agipapel iti uray la nga
santo manen punnuen ti karakara
tapno manen ken manen ken manen
masunotan ti agbakkuar.
Sa ita, kunaem, dispensa me,
mi presidente honorable elegante a torpe
iti awanan bain a panagbibinnalse,
sala a tinawid manipud
ti duogan a kinaawanan-bain
a no mangikipas ket di mangilin.
Sa ita daytoy a dispensar,
panangirugi iti balabalaen a panagulaw.
Maysa nga allawig daytoy a pammakawan:
kukuami nga umili ti mamakawan.
Saan a sika ti mangted iti pakunsuelo:
dakami ti nagpautang iti naimbag a nakem
dakami ti mangikaasi iti sursuruenna a saem.
A Solver Agcaoili
Hon, HI/Dec 23/08
2 comments:
wea, ni nana sorry aquino...
agsori, kaka, ket di met nakipagrali ken di met naturog idiay EDSA a diario ti ap-ap ti bukot iti semento! Naa!
agsori ket di met simmurot idiay Jericho March iti Senado a nangsabatan kadakami dagiti kampon ni Fernando Poe Jr!
anian a babak, anian a rigodon, anian a di mamingga a sirkus dagiti sirkero iti wayawayatayo!
Post a Comment