GAZA CITY, Gaza Strip –Nagitennag iti nasurok a sangagasut a tonelada ti bomba dagiti eroplano a panggera ti Israel idiay Gaza idi Dis. 27. Adda iti turay ti Hamas ti nasao a lugar. Namkuatan ti pannakatay ti nasurok a 200 a tattao daytoy a kampania ti Israel kontra ti Palestino, kas panangdefensana kadagiti umilina iti agarup aginaldaw a panagpatayabda iti missile iti sakupen ti Israel.
1.
Dumket ti eksena
iti muging a mautoyan
makigingginnantil
iti daytoy a malmalaga:
ti sirena a wangwang
ti panagbakwit dagiti buteng
ti kanalbuong a pasakalye
ti makapisti a pangpanggepen
dagiti mortar, kanion, rifle
kas kadagiti tao a welwel
kas iti didigran nga imud
dagiti sibabalud a pagel
ti pannagna iti isu met laeng
a dana, kabsat iti kabsat
iti ritual dagiti tulagan a makalasat
kadagiti husga ti pinnaksiat.
Rumkuas dagiti al-allia
ti ganggandiong a kappia
iti daga a naikari
iti siglosiglo itan a riri.
Ania a pallatibong
ti mangpugsat iti anges
ti dua gasut di agkurang a biag
no di ket agsurok a binnales?
Adda man bomba iti lukong
ti dakulap dagiti naidasay
adda man kadagiti soldado
ni patay wenno ti bomba iti kabusor
adda man iti tartaraudi a saludsod
iti kanito ti mangukom a dios
mano pay dagiti ubing a sugat
ti maipatli iti aglakaddugan a ranggas?
Ta kasano nga ilawlawagmo
iti agar-arakattot a tapok iti pagbabakalan
tumayok a kas salamangka
nga agsuek iti patibong
ti isu met laeng tapok nga adalan
tapno iti saan laeng a maminpinsan
ket makasursuro a di mainsasaan
nga agbirok iti angot ti dara nga iyatang
iti altar ti dios nga agpampamayan
iti templo dagiti mannubbot a pimpiman?
Agsusupadi dagiti aweng ita,
dua nga aldaw kalpasan ti paskua
ti pannakayanak ti maladaga
a mangispal kadatayo
iti panagpipinnagungga
a panangiyadal iti leksion
ti mataginayon a kappia:
kanion kontra iti bato
panagipangta kontra iti pamutbuteng.
biag nga utangen, biag nga imaro.
Kasano nga itabonmo dagitoy a buya
iti aglawlaw dagiti nadiosan a purok
ti sementerio dagiti agbabbabawi a lua
a koma ket tumrem manipud kadagiti turod
wenno taeng a mabalo, maulila
marebba kas iti panteon ti ari nga ulbod?
2.
Asinno a Palestino ti di masugatan
kadagiti maburak a panggep
kas iti agwarawara a riduma
dagiti bomba nga iti dulang
iti panawen ti panagraranud
adda iti ungot?
Asino nga Israelita ti di matay
kadagiti sao nga iti barukong
punial daytoy a maitugkik
iti amin a puon
ti panagsagaba iti antigo
a panagur-uray
iti final a sapata
kabsat iti kabsat
iti dara kas iti panagsagaba?
Di kadi ta maymaysa a bagi
ti naggapuan a puli
dagiti maris ti sabong
kadagiti tanem dagiti pimmusay
iti man Gaza
iti Jerusalem
iti West Bank
iti Tel Aviv
nga amin ket nakakita
iti panagbettak ti guranggura
iti purok a pakaimassayagan
dagiti bangkay nga agmadi
koma a pumusay
iti purok ti profeta
ti daniw ti rebolusionario nga ayat
a kadagiti agek agpitik, agungar,
agbiag?
A. Solver Agcaoili
Hon, HI/Dec 28/08
3 comments:
Kasla iti mapaspasamak ita a pinniltakan dagiti mannurat-nga-Ilokano ti maar-aramid idiay Gaza; pare-parehoda amin a taray-kurgit!
VF: the sharf, sharp you. Mangiburayka koma kadagita a nakatirtirad ken nakatadtadem a panirigan tapno iti kasta ket makasursuro dagiti mannurat nga Ilokano, genuine man dagitoy wenno agin-ge-genuine. nabunga koma ti baro a tawenmo.
VF: agarrapak--dispensarem. 'sharp' koma daydiay. my bad.
Post a Comment