Pagparintumengennak ti daniw.
Ta ti daniw ket maysa met nga ubbog
ni ayat a pagkurnuan
dagiti kasamekan ken kapanagan
iti barukong.
Briaten ti daniw dagiti aglulusiaw
nga urat dagiti takiag iti uniberso ni pintas,
dagitay urat a makipagsipungtuan
kadagiti litania ti naibabawi a paraiso
iti man bannawag wenno iti kidem
a rabii, kadagiti angin a sumarut
iti rupa ti naumbi a bulan, kannag
wenno simmagaysay, agpapauyo
wenno darudar kas iti panagdarudar
dagiti maibinggas a balikas
nga orasion kadagiti agpatnag a kararag
wenno bunar a mangisagut iti sam-it
wenno naimbag a gasat
wenno ti anak ti diablo
nga alumpipinig iti nakem, sumilud
a di agpakpakada, mangibati iti letteg
iti lukong ti palad wenno sangi wenno teltel,
sugat nga agkitebkiteb,
di aglunit uray no mano
nga abrakadabra kadagiti paulo,
wenno rima wenno panagiballatek
kadagiti padas a naipatarus
kadagiti mababain a linia
kadagiti mangibabain a panagsalawasaw
kadagiti pakaibabainan a panagtabbaw
kadagiti kababain a panagtarabitab.
Pagparintumengannak ti daniw.
Kadagiti ulimek iti babaet dagiti ariangga
a parnuayen ti buteng kadagiti binatog
dagiti nakain-inaka a sao, sadiay a tumrarong
dagiti natitirad a bantay, agkikibinda
a mangitunda iti mannaniw
iti puseg ti baybay
iti puseg dagiti sagrado a darikmat
iti puseg dagiti wawaig ken bubon
a partuaten ti managdakiwas a turay
dagiti maikanatad a balikas
dagiti umiso a balikas
dagiti napudno a balikas
dagiti nabileg a balikas
a naynay a makapaadda kadagiti amin
nga awan pay iti panunot wenno iti rikna,
daytay panunot a managpili iti pagsasao
daytay rikna a nakusim wenno manglanglangan,
saan a mangipauneg iti labatiba wenno pagpurga
saan met a sumimsim wenno tumilmon iti ling-et
wenno katay wenno telkak wenno tupra
a pangpapigket iti rikepan a sobre ni rugso
a para kadagiti isu amin a makabiag
a para kadagiti isu amin a mangpakulaidag iti laladot
a para kadagiti isu amin a mangriing iti turog.
Pagparintumengennak ti daniw.
Iti kasta, inaldaw a sangalek dialogo
ni derrep, daytay panangibinggas
iti estranghero nga an-anek-ek:
ti maipapan iti puli dagiti essem
ti maipapan iti tribo dagiti anag
ti maipapan iti ili dagiti bugas
ti maipapan iti gimong dagiti kaipapan
ti maipapan iti pagilian dagiti protesta
dagiti amin a mabalin nga yebkas
wenno isao wenno isawang
wenno ikur-it kadagiti ulimek dagiti ulimek
a pakapunnuan amin a kurang ken pagkurangan
a pakatungpalan amin a kari ken kaikarian
a pagaddaan amin nga awan ken kinaawan
a siuman dagiti palso ken nalaad
a kamalala dagiti mailaklako a rigat.
Pagparintumengennak ti daniw.
Iti panagtamed, awatek ti kired
iti makaisalakan a palpaliiw.
Aurelio S. Agcaoili
Las Vegas, Nevada
Dis. 16, 2004
No comments:
Post a Comment