No madanon ti maikatlo nga aldaw
Iti kinaitatta dagiti ar-araraw
Agungarto ti naitabon a tellaay
Makipagungar iti agungar a panday.
Kastoy ti ebanghelio dagiti mannanao,
Dagiti tarabit a komersiante iti sao,
Dagiti suitik a merkader rigrigattayo,
Dagiti mangay-ayam kinaawanan gawaytayo.
Maysa nga eksena ti tularamid daytoy,
Daytay panangiwaragawag karit a kastoy,
'Tay panangisaklang kadagiti dadaulo,
'Tay panangikorte iti gagem a sekreto.
Planuenda dagitoy a gagem iti rabii,
Iti katengngaan ridep a manangngaasi,
Dagiti agbambantay nga oras iti idda,
Dagiti mangbenbendision a panagatipapa.
Ta ania ngarud ti maaramidan dagiti kailian,
Ta ania ngarud ti bileg dagiti agsarsaraawan,
No di agtainep iti padaya a pagraragsakan,
Panagpunsion dagiti boksit a mabisbisinan?
Isu nga iti agmatuon dagiti liday ken ladingit,
Simmangparagsit met dagiti lallaki a natangsit,
Balabalaenda dagiti wagas ti sabali a sangsangit,
Patalappuagawenda agmangmangisit nga ansisit.
Sinnubot daytoy, kunada, sinnubot agingga't inggana,
Panangisalakan pannakapadso dagiti sapasap a lulua,
Sinnubbot a panangiprusision iti bangkay ti panday,
Sinnubbot a pangtubay iti rikna nakariing a nagabay.
Ay-ayamenda nga awan patinggana, ay-ayamenda latta,
Ti ladawan ti malalaki iti muging dagiti parmata,
Daytay ladawan ti malalaki a taklin dagiti pobre,
Daytoy maitabon a ladawan iti kamposanto ti kari.
Aurelio S. Agcaoili
Torrance, CA
Dis. 23, 2004
No comments:
Post a Comment