(Para ken ni Joel Manuel, agiyul-ulog iti daniw ni Neruda;
ken ni Roy Aragon, agdandaniw latta)
Rumidepak koman, mannaniw, ta rabiin ditoy.
Ngem nagkukot iti suli ti kettang iti agmalem
A panagkatangkatang kadagiti linabag
A di maisurat, di mayebkas gapu iti damag iti ili
A naggapuan, ramut dagiti sirmata a signos
Ti madagdagullit a pannakayaw-awan.
Kunam sa: agtalakiaw met ti isip, lumagto
Kas iti presko nga udang nga ikkan koma
Iti sili ti sairo santo perresan iti dalayap
A sagot dagiti binangungot a kaibaan.
Anian a kilawen, pangimas iti pannangan,
Pasakalye iti panaggalgal a panagikabesa
Kadagiti paulo dagiti daniw nga isurattay
Iti kapanagan wenno kadagiti paratong
A pagbirokan kadagiti uong a mannagadu
Wenno uong ti billit wenno uong ti pagaw
A sagpaw ti naganus a bunga ti marunggay,
Daytay narasi pay laeng ken addaan sabeng
Kas kadagiti pangngaring nga igamertayo
Kadagiti pakasaritaan ti rikna, daytay aristokratiko
A panaginnala ti umuna a sipnget ken maudi
A lawag iti puyupuyan a pagtibnokan ti danum
Ti bantay wenno ubbog ken ti danum iti adat.
Dagitoy dagiti ramen ti intay panagsurat-surat
Uray no agdudungsan ti pungan wenno ules
Nga inabel dagiti adipen iti maikatlo a lubong,
Inabel a pinangrukodanda pimam iti kabaelan
Ti imahinasion ti agabel, kadagiti man nakadisenio
A pangakkob iti bagi manipud iti panait wenno
Tured manipud dagiti makabiag a tagainep
Maipapan ti kinasapasap ti darang ti ubing nga init
Wenno ti bang-ar manipud iti pul-oy ti amian.
Agsuratak, latta, kabagis a mannaniw,
Kasilpo dagiti amin a nakem nga al-alawen
Manipud iti alinuno dagiti ariangga iti man
Ulimek wenno kadagiti narasaw a sasaotayo.
Bansorem latta ida, kunam, ket bansorentayo
Amin a pangngadua. Saplitantay ketdi ida iti ipus
Ti pagi ket babaen kadagiti tamudotayo nga aramat
Kadagitoy dunggirdunggir a panagdaniw, surutentay
Dagiti kursada ni waya kadagiti piglat iti bukot ti kalaban.
Kadagitoy a piglat a mabirokantayo ti timek
Ti panagwaywayas dagiti malmalday a plumatayo
Iti baet dagiti karsel dagiti kinumawda a balikas.
Dagitoy dagiti timektayo, datayo a pinagbalinda
A duldog a baed, datayo nga inagawanda iti dayyeng.
Aurelio S. Agcaoili
Dis. 15, 2004
Artesia, CA
No comments:
Post a Comment