Uray kasano a tutuok, uray no agtulakaktayo
Iti waw ken bisin ken amin a panagbuteng
Umay ti namnama, kadarato nga umay
Iti bigat dagiti darepdeptayo, iti panawen
Ti panagriingtayo a nasapsapa ngem
Dagiti malinnaawan ken naridap a rikna.
Kuna dagiti damag iti daga a nakayanakan:
Sakasaka ken saksakidol dagiti mamati
A sumuknal iti templo dagiti masida
Wenno kalluto a kabaruanan, wenno
Bang-i ti ittip a rumasuk iti rusok,
Manglanglangan iti husto a bussog
Mangsegsegga iti iliw iti nalingta nga ikan,
Dagitay maalaw kadagiti malmalmes a danum
Kadagiti matikawtikaw a baybay. Iti sabangan
Dagiti amin a regget iti asin a maimurumor iti labay
Wenno maisudsusudsod kas iti bukel ti utong
Kadagiti gumawgawawa a bakras dagiti turod,
Sadiay nga agkammaysa ti tamnay iti bisintayo
Ken ti apgad dagiti nakail-ilala unay a sirmata
Maipapan kadagiti manumeruan a maipapel
A kinalabon kadagiti pagraramanan a ragsak,
Pekpekkel para kadagiti isu amin a tagainep
A madi ken nalidem, kontra signos ti dakes
Iti gasat wenno iti kapay-antayo a kayattayo
Met laeng, wenno kinayattayo lattan ta awan
Ngamin dagiti bandos wenno bituen iti sardam
A mangisuro iti umiso a pul-oy a kannayon
Dagiti pia ken karadkadtayo manipud idi punganay
Ken agingga koma itatta. Ngem ala, adda paripirip
Maipapan iti panagballigitayo a mangipayapay
Iti aklo a malmalday sakbay a kalungkongentayo
Dagiti kalangakang a pinggan wenno ungot.
Malagiptayo dagiti seremonia ti linglingay,
Am-ampog iti mata kas iti ubing a nakusim,
Daytoy ar-arkos dagiti dila dagiti tatang,
Senial dagiti naimot pay laeng nga aldaw,
Ti managimbubukod a pariok wenno banga
Wenno sinublan a pagalaan iti bingay
Iti pagdadayaan. Ditoy a sumangbay
Dagiti lagip, dumtengda kas mannanakaw
Iti rabrabii wenno katengngaan ti aldaw:
"Asin, asin, makalulukmeg iti pingping,
Asin, asin, makalulukmeg iti pingping."
Aurelio S. Agcaoili
Torrance, CA
Dec. 20, 2004
No comments:
Post a Comment