Sunod-Sunod Ang Bagyo Sa Atin

Nasa malayo man kami, kaylapit naman ang balita

Tungkol sa atin. Mga sunod-sunod na bagyong

Nangungutang ng pagkain sa pagdapa ng mga bukid

Sa pagsuko na naman ng mga palay sa hampas



Ng mga banyagang hangin. Makikita namin ang imaheng

Nagwawaldas ng dasal at nangungurakot ng panalangin:

Mga batang inanod ng baha o nilamon ng mga gabi

Ng mga daluyong na di nagpapaalam kung dumating



Tulad ng mga daluyong sa ating mga lansangang

Naglilibing ng mga pag-asang makaalis sa mahika

Ng karukhaang minamaskarahan ng tabi-tabing

Hintayan mula sa ating mga pawis at pangarap;



Mga pami-pamilyang kuyog-kuyog kung tangayin

Ng agos mula sa mga bundok, mula sa mga buhos

Ng ulan, mula sa mga lupang inutang ng kapalaran

Sa mga nagtotroso sa mga gubat sa ating kabahayan;



Mga kabataan kung bumulagta ay parang ibong

Tinirador, pinag-ensayuhan ng kaliweteng kalamidad,

Traidor kung bumanat, patalikod kung managad

Tulad ng pananagad ng mga pinuno natin sa ating



Pagtitimpi, sa ating pang-unawa, sa ating pagnanais

Na darating din ang araw ng pagsusumamo ng mga bagyo,

Paghingi ng tawad sa atin at sa lahat ng mga nauna

Sa atin na inagawan ng subo, pinagkaitan ng makulay



Na panaginip, yung ang mga kulay ay kasingtingkad

Ng araw bago ang walang wawang ulan, o dili kaya

Ay yaong nagbibinatang araw pagkatapos ng hunos,

Tirik ang mga rayang tumatagos sa mga malinaw



Na ilog, sa mga namamasa-masa pang lupang

Naghihintay ng araro, ng panabas, ng haplos

Ng mga magbubukid na tinangay ng mga ipu-ipo,

Mga mangingisdang nilamon ng dagat ayon



Sa maagang pasabi ng bandos o kometa kaya

Ng mga matatabil na dapit-hapon, yung panahon

Ng huntahan ng mga nangawala sa sunod-sunod

Na bagyo, iniisa-isa ang masaklap na sinapit,



Minamarkahan ang mga muhon ng bangungot

Upang paggising ay maituturo ang mananagot

Madadala sila sa husgado ng lahat na makatarungan

Ipipiit sa selda ng isip ang lahat na nambusabos



Sa mga humahalakhak na bagong silang na liwayway

Sa mga naglalanding hampas ng alon sa mga batong

Saksi sa pagsasamantala ng mga kalahating panginoon

Sa hanging amihang mag-aaruga sa buntis nang palay



At muli, tayo ay haharap sa hapag-kainan, tayong

Lahat, nangawala at nawala, umalis at iniwan,

Nagbalik at binalikan, tayong lahat na nagmamay-ari

Ng mga kuwento ng katubusan, ng basi ng kaligtasan.



At tayo'y magsasaya muli, maggagalak tulad ng dati,

At tayo'y iinum ng alak mula sa mga bungo ng kaaway

Iinum tayo mula sa kopita ng pagpapanibagong-buhay

Tatamasahin natin ang sukli ng pagsasanla sa hukay.





Aurelio S. Agcaoili

Dis. 2, 2004