Ti Hidalgo Dagiti Mannaniw

(Para ken Juan SP Hidalgo Jr, mannaniw primero)





1. Pagtawingan



Ipintam ti dunurdunor nga estoria ti away

Wenno maysa a malem iti bantay ti Vintar

Iti blangko a kambas dagiti kolor ken ranggas.



Maimatangak ti dua a gerero dagiti adu a sugat

Iti man bala wenno kampilan wenno panagtutuok

Dagiti makipagili kadagiti demokratiko nga ayat.



Dua nga agkabsat, hidalgo dagiti gubgubat.

Dua nga agkabsat nga agtinnodas iti bagiw

Dagiti aristokratiko a rektanggulo ti kambas



Ken daytay sangalata a pintura nga ipilgad

Kadagiti rabii, agmatuon, aldaw, kanibusanan

Kadagiti panaglalaok dagiti nangisit, nalabaga,



Asul, naranghita, berde, amarilio, ken tured

A mangpabuddak iti dara nga agpusuak manipud

Iti turod ti pagbabakalan dagiti adu a peggad.



Dua nga agkabsat, hidalgo a mannaniw, agkabsat

A natakneng a mangitukit iti bukel ti risiris

Kadagiti bantay ken kapatagan, kadagiti tanap



Ken pabrika dagiti malagalaga a panagsagsagaba

Iti naunday unayen a panawen, kas iti estoria

Ti masaker dagiti mula ken agmulmula iti Padlao



Wenno Marag wenno Escalante. Iramantay itan

Ti hasienda dagiti addaan gaway ken laing

Iti man Tarlac wenno iti sabali a pagarian.



Isu ta isu latta dagiti rumuk-at a ladawan

Kadagiti nanakman ken managrikna a kurditan,

Dagiti testigo ti panay a pudno, di sinsinan.





2. Pagtamdagan



Ipintam ti salawasaw iti ladrilio a pader,

Agrurutap nga ebanghelio ti adu a kinaruker.



Bersikulo ti daan a pakasaritaan iti uneg,

Bersikulo ti karsel ti sarita iti puseg.



Ammomi itan: ladawan ti sao, sao ti ladawan,

Natakneng nga aramid dagiti laing a pimpiman,



Makadunggiar iti pannirig no di man makasagid

Iti kaunggan ken kinatao't mannaniw a natalged.





Aurelio S. Agcaoili

Dis. 11, 2004

Torrance, CA

2 comments:

Ariel S. Tabag said...

manong, pasensia a talaga ta ita laeng a nasalawko daytoy daniwyo ken ni apong. ti pappapanak ngamin idi ket diay daan a blog ne ket nagsardeng sa metten nga agdaniw kunkunak la ketdin. hehe, mabainak a naseknan iti kinakuneng.

ala wen idanonkonto daytoy daniwyo, iti apongtayo, iti literatura ken aramid

dios ti manarabay iti amin a gannuattayo...

ariel said...

Reberendo Ariel,
ti pammakawan adda koma kenka. anian!
sapay ta maikarkari ken ni apong JSP daytoy.
Manong A