Ita a bigat a pannakaamad iti innem a gasut a pimmusay
Iti Aurora, Quezon ken kadagiti tutuoktay amin iti pagilian,
Nakasirpatak, kailian, iti Rimat ken Bannawag iti sulinek
Dagiti kuadrado nga ulimek. Addaak ditoy ita iti biblioteka
Dagiti amin a panangay-ay iti bagi. Naintar-intar dagiti natay
Kadagiti il-ili, kapanagan, kapitakpitakan kas iti panaggiintar
Dagiti libro ken amin a pagadawan iti adal ken laing iti babaet
Dagiti estranghero a rikna mangitukit iti panagmuttaleng
Wenno dagitay man sasaibbek a di maipeksa dagiti kolor
Nga agtitinnibnok, kas iti kolor ti dara iti parupa ti diario
A mangikaskasaba iti rurod, daytay panagbirri koma ti daga,
Daytay panangalun-onna koma kadagiti amin a kinaulbod
Ken kinakusit kadagiti letra ni ayat ken panagdungngo.
Awan ta awan sa ketdin dagiti babassit a lengguahe ni asi
Kadagiti dursok ti dalluyon wenno kimat wenno dawel ti layus
Iti man Rimat wenno Bannawag, lagip wenno pannakalipat.
Ipintak iti mugingko ti maysa a kambas ni kinaranggas:
Marba dagiti bantay ngem di agtektek dagiti saltek
Ken imbes nga umageptayo iti daga wenno agpatedted
Iti arak ti basi santo kunaen, Bagiyo, apo, bagiyo!
Riputen dagiti narungsot a danum dagiti kailian. Siririing
Dagiti dadduma. Tagtagiurayenda dagiti sagut ti sardam,
Dagitay sagut ti panagarog wenno pannakibasingkawel
Dagiti palludip kadagiti kinnikinni ti makaarem met nga angin.
Nargaan turog dagiti dadduma kalpasan ti nalabon
A pangrabii a pangngaldaw a pammigat metten.
Iti tagainep, agsisipungtuan dagiti apres, yanudda
Dagiti gabat manipud kadagiti pantok ken bakras
Ket agtunda da amin iti mangirubo a taaw ti bakes,
Isuda a buyot dagiti addaan iti pirak a panggudtaym
Iti sulisog ti nara wenno molave wenno tanggile,
Sagat wenno saan a pangabrot iti kettang ken rigat
Ti mangmanso kadagiti bulong, sabong ti orkidia,
Umok dagiti tumatayab, teritorio dagiti karasaen.
Agibales met ti nakaparsuaan, ibir-atto a sumaruno
Ti Rimat ken Bannawag ket agkorotayo nga agbaing,
Maysa laeng, pangsukal kadagiti kinukusit a talugading
Dagiti malalaki nga aginlalaing, kadagiti mangidiaya
Iti pammakawan kadagiti agiggem iti ragadi ken buneng,
Isuda a mangigkigtot kadagiti kasamekan, al-alia dagiti kayo
Wenno dagitay higante a mannabako, silalabus no agbado,
Sangadangan a ginasut ti pangar-arakda iti metro
Sangadangan a ginasut ti kasukat ti agawan a diro
Sangadangan a ginasut a sandi ti panagkuripaspas ti tao.
Aurelio S. Agcaoili
Dis. 3, 2004
4 comments:
Mg Ariel,
Ay aniattan ta napamuttalengak a nangbasbasa itoy "daning-awmo", manong. My goodness, dagita a "silalabus no agbado" a tattao a kunam, kunam no masasakitda iti pannakasaluad ti aglawlawtayo. Naman ta isuda koma ti rinim-it dagiti nayanud a kaykayo ken ginaburan ti pitak.
Bansorem latta ida, kaka! Naragsak a Paskua ken Nabungbunga pay a Baro a Tawen. Good Luck iti daydiay International Conference a paglektiuranyo ton Enero, Manong. Dumngegto ti lubong iti maysa nga Ilokano. A defining moment, siguradoak. Keep on. Ipostyonto ti lektureyo ditoy manong ta siguradomi a pannakatagapulotminto ditoy - maysanto a paset daytoy universidadtayo nga awan beddengna.
joel
Joel:
Dios ti agngina. Ti kinapudnona, dagiti kailian ti gapu ken pakaigapuan dagitoy. Agdardara ti nakemko, adi.
Kunak idi a no malpaskan nga agbasa dita UP, agawidkanto idiay Ilocos tapno sikanton ti mangidaulo idiay MMSU. Kaduaendakanto uray no addakami iti adayo. Kasta idi ti ibagbaga kaniak ni Manong JSP ngem sabali met ti nagturturongakon.
I want this distance--and this grace from memory. I want to write some more and finish that Kailokuan Quartet. It consumes me so.
Merry Christmas to you as well. It is chilly here--and the mornings are not kind either. Kastan sa ketdi pay laeng idiay Banna, ania?
Manong A
manong ariel,
panagkunak, nalam-ek pay laeng didiay Banna, manong nupay diak pay nakaawid. uray siak no dadduma, kail-iliwko la unay didiay isu a kayatko latta ti agsurat a didiay ti settingna. kasla pangipaaruyotak iti iliwko,kaslaak la daytay man agan-aneng-eng nga uken a naudi a naipusing iti inana.
itan, dandani agattupig manen dagiti away, makipaskua dagiti taga-salpad iti laya wenno itlog wenno native a manok, mangriri dagiti kaniobong... ket silalagipkay latta kadagiti tinubong ken taptapat.
agyamanak kadagita pammagbagayo manong; wen bayadak laeng ti scholarshipko, mabalinen ti rummuar iti DepEd ket no adda gasat padasen ta kunayo. Ala ngarud, manong, ileppasyo dayta proyektoyo a quartet. Nalaklakayon nga isurat ita gapu iti distansiayo ditoy. Ania ti awagtayo iti dayta a penomenon, manong, tay ad-adda a naklaro ti panagkitam no ad-adayoka ket iti kasta, maisuratmo a nalawag ti kayatmo nga isurat?
manen, naimbag a Paskuam ken kasta metten iti kaamaam. Kasta met a paskua dagiti kakadua dita a makipaskua latta iti rabaw ken sirok ti niebe ta ngamin kanayon a rutrot ti sako ni San Nicolas de las Islas Filipinas. Hasta la vista, nuestro profesor!
joel
Dear Joel:
i like your word: agattupig ti away. my goodness, nalipatak daytan nga angot, adi.
wen, masapul dagiti addaan utek a mangimaton iti unibersidadtayo. dakaminton ti agatestation ken manginominar kenka ta tengglemton. saan ketdi a dagiti sitsitik a zombie dagiti politiko dita.
daytay saludsodmo: distantiation, kunada, dayta. maysa a hermeutic reference. ala, yagawan latta ngarud tapno
mailaklak-amnakami, wen?
ti apo a mannakabalin ken namarsua ti saluadmo iti amin a panggepmo. makautangto ti pakasaritaantayo gapu iti panangipategmo ti ramut ti kinaasinnotayo--ti ramut ti kararuatayo.
hasta la vista tambien. feliz navidad, maestro!
Post a Comment