Pimmusayen ti Presidente ti Republika Dagiti Pobre

1.

Patgen a babaknang:



Ita a panagligsay

ti katengngaan ti sipnget,

pimmusayen ti presidentemi,

daytay pangulomi,

dakami a makipagili

iti republika dagiti pobre,

republikami nga agmirmiraut

iti saluyot wenno marunggay

a pammarakubaken a yabraw

kadagiti tagainep iti nakararagan

a pammigat, ti di nalisayan

a pangngaldaw,

ti di nagkiraos a pangrabii,



dakami a mabisbisinan

iti kalinlinay nga inapuy

wenno hustisia

iti masida iti dulang

dakami a mawaw

iti danum ti kappia

iti antigo a gimong

dagiti mannanakaw,

aduda a duog

a mannanakaw,

iti turay

wenno kalkalsada,

dagiti birkog

a heneral dagiti amin a butengmi

a kolonel dagiti amin a duaduami

a kapitan dagiti amin a panagsagabami

a teniente dagiti amin a panaganusmi.



2.

Pimmusayen ti presidente ti republika

dagiti amin nga ar-ararawmi,

daytay dadaulomi iti pantasia

dagiti dimi mabilang a pannakasubbot

kadagiti amin a sukir ken sairo,

siririingkami wenno nargaan iti turog.



Sumuknalkaminto iti massayag

dagiti adu a namnamami,

ti adu a panangibabaet kadakami

ti presidente dagiti duayyami.

Sumuknalkaminto, dakami a dungrit,

dakami a mukatmukat, dakami a bilbilokan,

dakami a naangdod ken naangot,

dakami nga agdigdigos iti ling-et

dakami nga agkape iti agsaraaw a bagas

wenno mais, wenno kinirog a barako

a tedtedda dagiti adda iti ballasiw-taaw,

dakami nga aglauya iti paragpag ti ikan

a sushida idiay Makati wenno Japan,

dakami nga agsigang iti ulo

ti udang, inkaasi

ti bugbugian a bagi,

kinamaron rebosado

dagiti ari-ari

ken agin-aari

idiay Paris

wenno Aparri.



Sakasakakaminto

a mapan sumuknal,

dakami a makipagili

iti republika dagiti pobre

dakami nga agam-amlid

ta nangina ti sabon

ta nangina ti danum

ta nangina ti sabidong

a pagsamal koma no mabalin

wenno pangpatibong

kadagiti baliodong

isuda nga uloulo

ti amin a kinalanggong.



Sakasakakaminto a sumuknal

tapno mariknami ti lamiis

ti marmol a datar,

daytay nakasilsilap

a pagiladan dagiti guduagudua a dios

wenno baddekan dagiti nalamuyot a sakada

wenno pagulanganto dagiti ubbingmi

a mangisunonto iti naidasay a presidente

a mangipatakderto iti templo dagiti mamati

a mangirakurakto iti kinapudno

dagiti eksena ti panangisalakan

kadagiti amin a marigrigat

amin a maidaddadanes

amin a maikuskuspil

amin a mapapaidaman

amin a makuskusit

amin a maaw-awanan.





3.

Sumuknalkaminto iti presidente

dagiti amin a kalbariomi.

Makipilakaminto iti pila

dagiti amin a sumuknal,

babaknang wenno agimbabaknang,

nagbangbanglo wenno nabangsit,

mamati iti kinapresidente

ti pimmusay wenno saan.

Kalpasan ti pananglusaklusakmi

iti panaglidliday

ti maysa pay a babai,

diminton bibiangan

dagiti petalo iti korona ti natay,

dagitay sabsabong a nangina

ken napusaksak,

nangina ta napusaksak,

puraw nga orkidia

nalabaga nga anturium

ken berde a pakpako,

amin dagitoy a bisti iti ipupusay,

amin dagitoy nga aggapu

iti panagulser ti bagismi kas ti isipmi,

ayna, dinto inggaan ti ungetmi.

Pirsapirsayenminto amin a pakalaglagipan

ti pannakapaay dagiti ar-arawmi,

ti pannakakeltay dagiti ar-arapaapmi.



Pimmusayen ti presidente

ti republika dagiti pobre.

Awan ta awan sa lattan ti namnamami.



3.

Isu ngarud, kakabsat a babaknang,

umaykayo met, a, sumuknal,

dakayo nga aglablabonan, dakayo

a presidente dagiti parparapo

a senador dagiti panaginkukuna

a diputado dagiti panagindidi

a gobernador dagiti panagindadalus

iti ima wenno iti aramid,

umaykayo ta imatanganyo

ti maikatlo nga aldaw

ti aldaw ti panangungar

dagiti an-anib,

dagiti intabonda nga an-anting

dagiti presidente nga aginlalaing.



Dagiti nagsurat a siraraem,



Dakami a saanen a siraraem kadakayo,

dakami amin a pobre, makipagili

iti republika ti pimmusayen

a presidente, republikami,

dakami amin a tinallikudan ti kari.





Aurelio S. Agcaoili

Torrance, CA

Dis. 17, 2004