(Para sa mga magigiting na makatang Ilokano: Roy, Joel,
Dan, Pete, Rene)
Bilangin natin ang mga sayang
Simula sa sumuko nang siglo
Ng pagsasamantala ng mga kauri
At kalaban, sa diwa man o sa isip.
Ihinahain sa atin ang kamandag
Ng mga kobra mula sa mga salitang
Laban sa atin na ginagawang mangmang.
Ganun din na ipinapainom sa atin
Ang lason ng paglimot at tayong
Lahat ay maging manhid
Mula puso hanggang puson.
At tayo ang mga ito.
Tayong mga nilalang pa man din
Ng mga panaginip
Sa mga nagbabagang dibdib
Ng mga nangangarap na magdamag.
Gabi at araw
Ay ipinaglilihi natin ang panaginip.
Ipinapanganak natin ang sinag ng araw
Na pumapaso sa mga parang
Na bumubuhay sa mga kaingin
Na gumigising sa mga inaantok na tubig.
Tayong lahat ang mga ito,
Tayong mga ginagawang walang muwang
Ng mga pagkakataong kinamkam
Sa atin ng mga nakabaro't sayang
Mga panginoon, silang may titulo
Sa mga dapit-hapon at hatinggabi
Silang may prangkisa sa mga diskurso
Ng ingay at paghahambog
Ng mga mapanirang kulisap
Sa mga palayan at maisan
Ng ating mga tula
Ng ating mga damdamin.
Siklot-siklot na mga sayang
Ang sa atin, kapalaran pa man din
Na itinadhana ng mga baha at daluyong
Banyaga sa kanila ang karahasan
Tulad ng kanilang mga pangalan.
Siklot-siklot na mga sayang
Ang sa atin, di matatapos
Na pighati at pang-aapi
Kapag di simulang pigtalin.
Aurelio S. Agcaoili
Torrance, CA
Dis. 10, 2004
2 comments:
maraming-maraming salamat, manong ariel, sa lagi't palagiang banggit, sa alaala't alala sa amin, sa akin, sa ating mga sinimula't simulain, sa atin muling mga gawi't gawain...
sana ay makabawi pa ako. sana ay makatula pa rin ako nang makatula, di na lang palaging natutulala't walang maitula. napakainam na inspirasyon itong iyong mga tula't pagtula sa blog, sisikapin ko rin ngarud na makatula at muling tumula.
dear roy:
di ako nakakalimot sa simulain. ito ang sanhin ng mga sanhi. ituloy natin ang ating pakikialam--kahit man lamang sa pagtula.
Manong A
Post a Comment